United-in Henderson chelh tum

Manchester United chuan Sheffield United-a loan hmanga khel mek Dean Henderson chu chelh an tum a, contract thar an zawrh dawn tih thawm a awm. Zanin dar 10:30 hian Aston Villa-in Sheffield United hi an mikhual dawn a, Chris Wilder kaihhruai Blades hian Champions League beiseina an neih phak avangin inkhel hian ngaihven a hlawh ang.

Sheffield hian season tawp thlengin Henderson hi loan hmangin an chhawr dawn a, English keeper hian vawi 10 clean sheet a nei tawh. Manchester United keeper David de Gea erawhin vawi riat clean sheet a nei a, Henderson a tluk lo. 

Ole Gunnar Solskjaer chuan, "Tun season-ah tawnhriat ṭha tak a neih belh a, a khelh dan thlirin England leh Manchester United number 1 ni thei tur khawpin theihna a nei a ni," tiin a sawi a, contract an zawrh thu a sawi lang bawk.

Kum 23 mi Henderson hian kum 2011 khan Manchester United youth academy a zawm a; intuai hriam turin Stockport County, Grimsby Town, Shrewsbury Town leh Sheffield United-ah te a kal tawh a, amah neitu United first team tan a la inlan lo. English keeper hian De Gea a luahlan thei dawn a nih loh chuan United aiin a khelh phakna tur club zawm a thlang zawk ang.

Man United hi Sheffield United khingpui tur Aston Villa captain Jack Grealish nen an sawi zawm. Kum 24 mi Grealish hian a inzirchhuahna Villa tan rinawm duh mah se United erawh hnawl har a ti ang, tiin Villa striker hlui Kevin Philips chuan a sawi. 

Tun dinhmunah Villa hian point 25 hmuin table-ah 19-naah an awm mek a, an relegate a nih chuan theihna nei sang Grealish a cham reng lo ang.