League Cup semifinal khel tur a chiang ta

Leicester City lakah 3-1 in hnufual reng mah se Liverpool-in comeback ropui an lantir a, hun pek belh minute nganaa Takumi Minamino goal hmanga Foxes an draw pui hnuin penalty-ah 5-4 in an chak zui.

Foxes-in Jamie Vardy hmangin minute 13 chhungin goal hnih an khung hman a, Reds tan Alex Oxlade-Chamberlain chuan minute 19-naah si phurh a sut ṭhen. Mahse, Foxes-in James Maddison hmangin minute 33-naah an khung leh a, 3-1 a ni der.

Anfield-a inkhel mah ni se Liverpool-in Covid-19 leh hliam vangin an player neih ṭhat ber ber an thawhchhuahpui lo a, an tlawm mai a rinawm hman - right back Neco Williams chuan tlarhmaah hliam damkawr Roberto Firmino leh Minamino a thlawp vel!

Mahse, Jurgen Klopp-a'n chak a duh avangin mangan tawpah Diogo Jota a luhtir a, Portuguese forward hian minute 68-naah si phurh sut lehin a team tan beiseina a siam - Reds-in goal khat dang an la mamawh cheu a, an tlawm mai dawna a lan hnu, hun pek belh minute nganaah Minamino chu mamawh chhanna niin draw-na goal a rawn khung.

Penalty hmangin chak zawk zawn zui a ni a, Foxes tan Youri Tielemans, James Maddison, Marc Albrighton leh Kelechi Iheanacho ten pet goal mah se Liverpool keeper Caoimhin Kelleher chuan Luke Thomas leh Ryan Bertrand pet a dansak a, a team a chhanhim.

Liverpool lamah James Milner, Roberto Firmino, Alex Oxlade-Chamberlain, Naby Keïta leh Diogo Jota ten an khung a, hun pangngaia goal pawimawh khungtu Minamino chuan a khung lo thung.

League Cup quarterfinal inkhel dangah Chelsea chuan 2-0 in khualmualah Brentford an hneh a, mualneitu defender Pontus Jansson chuan Reece James-a ball cross chu minute 80-naah an lamah a tilut palh a, Christian Pulisic-a penalty hlawhchhuah chu Jorginho chuan minute 85-naah goal-ah a chantir bawk.

Tottenham Hotspur-in 2-1 in West Ham an hneh a, Spurs tana minute 29-naa Steven Bergwijn-a goal khung chu Hammers tan Jarrod Bowen chuan chhanglet nghal mah se an hlim authawm pawh a reh hmain Lucas Moura chuan goal khung lehin Spurs a chakpui.

Hetihlai hian Tottenham Hotspur Stadium pawn lamah buaina a chhuak a, mi panga man an ni.

League Cup - Quarterfinal

Tottenham Hotspur 2 - 1 West Ham United

TOT: Steven Bergwijn 29'; Lucas Moura 34'

WHU: Jarrod Bowen 32'

Brentford 0 - 2 Chelsea

CHE: Pontus Jansson 80' (OG); Jorginho 85' (P)

Liverpool 3 - 3 Leicester City

LIV: Alex Oxlade-Chamberlain 19'; Diogo Jota 68'; Takumi Minamino 90'

LEI: Jamie Vardy 9', 13'; James Maddison 33'

*Penalty-ah 5-4 in Liverpool an chak

League Cup - Semifinal

Chelsea vs Tottenham Hotspur

Arsenal vs Liverpool