Liverpool inkhel tur an sawn

December 26, Pathianni zan dar 6:00-a Liverpool leh Leeds United inkhel tur chu Covid-19 vangin khelh theih a ni rih dawn lo a, ruai ṭheh ni zan dar 6:00 veka Wolverhampton Wanderers leh Watford inkhel tur pawh sawn a ni - inkhel pahnih sawn a nih chhan hi Covid-19 vang a ni.

Leeds hian an inkhelh hun sawn hi an dil a, Premier League chuan hripui kai, damlo leh player inhliam ngah avangin Leeds tan inkhelh theih a nih loh thu an sawi a, Watford dilna pawh pawmsak an ni.

Watford hi Burnley leh Crystal Palace nena an inkhel tur pawh hripui vang thoin sawnsak an lo ni tawh a, Pathianni zana Wolves hmachhawn turin an la inpeih hman lo.

Hetihlai hian Everton boss Rafael Benitez chuan Pathianni zan dar 8:30-a Burnley nena an inkhel tur kaltlangpui tura tih a ni bik chu mak a tih thu a sawi a, Spanish manager chuan, "Hri kai leh player inhliam kan neih aṭanga thlirin match dang ang thoa min sawnsak kan beisei a, mahse, an tih loh avangin player 11 ka neih daih dawn leh dawn loh ka ngaihtuah a ngai a ni," tiin a lungawi lo hle.