Lalrinliana Hnamte a te lo!

Nizan Indian Super League inkhelah Hyderabad leh East Bengal chu 1-1 in an inhnehtawk a, Kolkata club tana khel ṭha em em mai Lalrinliana Hnamte chu hero of the match atan thlan a ni.

East Bengal tan Amir Dervisevic chuan minute 20-naah freekick aṭangin goal hmahruai a khung a, freekick hi Mizo tlangval Lalrinliana Hnamte hlawhchhuah a ni - Hyderabad tan Bartholomew Ogbeche chuan minute 35-naah si phurh a rawn sut a, hun tawp thlenga goal dang lut loin an inhnehtawk.

Chanmari tlangval Terina hian Daniel Chukwu tan pawh a siamsak a, mahse, season hmasaa China League One club Taizhou Yuanda tana khel Nigerian forward hian keeper chiah a hmachhawn chungin goal-ah a chantir thei lo.

Terina chuan, "Engtiklai pawha min thlawptu ka chhungte, ka nu leh pa, ka u leh nau, ka pi leh pute tan he award hi ka hlan a ni," tiin hero of the match award a dawn chungchang chu a sawi.

Nilaini zan khan Kerala Blasters chuan rin loh takin 3-0 in Chennaiyin an sawp a, Blasters tan Jorge Pereyra Díaz, Sahal Abdul Samad leh Adrian Luna ten goal khat ṭheuh an khung.

Blasters tan K. Lalṭhathanga'n inkhel bul a ṭan a, Bethlehem Vengthlang tlangval hian Diaz-a goal hmahruai khung tur hi a siamsak a ni - assist a mawi takzet.

Chennaiyin tan Jerry Lalrinzuala leh Lallianzuala Chhangte ten inkhel bul an ṭan bawk a, an lansarh zan a ni lo thung. 

December 22, Nilaini Zan

Chennaiyin 0 - 3 Kerala Blasters

KEB: Jorge Pereyra Díaz 9'; Sahal Abdul Samad 38'; Adrian Luna 79'

Nizan Inkhel Result

Hyderabad FC 1 - 1 SC East Bengal

HYD: Bartholomew Ogbeche 35'

SCE: Amir Dervisevic 20'

Zanin Inkhel Tur

Odisha FC 7:30 PM FC Goa