Bang hmaa thusawi ang chauh a ni - Conte

Tottenham Hotspur boss Antonio Conte chuan Ningania Premier League thuneitute leh manager te inrawnkhawmna chu awmze nei lo a nih thu a sawi a, "Bang hnena thusawi ang mai kan ni," tiin hun an khawhral thu a sawi!

Premier League leh manager te hi Covid-19 in Premier League a nghawng zel dan chungchang sawiin an inhmukhawm a, Thawhṭanni khan Premier League club aiawh inhmukhawm chuan league kalpui zel turin thutlukna an lo siam tawh.

Conte chuan, "Bang hnena thusawi ang lek kan ni a, chuvang chuan ka ngaihdan pawh ka sawi lo. A nihna dik tak sawi ila, coach-ten sawi leh zawh duh kan nei a, mahse, thutlukna engkim siamsa awmin kan meeting ve ringawt a ni ber.

"I hmaah bang chhah tak a awm chuan i duh chu i sawi thei a, mahse, thutlukna siamsa a nih avangin engmah a inthlak danglam lo ang," a ti.

Premier League-ah hri leng vangin match 13 ngawt chu a khelh hun sawn a ni ta a, kar hmasa test-ah chuan player leh staff zingah hri kai mi 90 an awm.