Blasters leh Jamshedpur inhnehtawk

Krismas ruai ṭheh zan, nizan khan Indian Super League-ah inkhel pakhat a awm a, Kerala Blasters leh Jamshedpur te chu 1-1 in an inhnehtawk.

Jamshedpur tan Greg Stewart chuan minute 14-na lekah freekick mawi bik hmangin goal hmahruai a khung a, Rangers forward hlui hian ISL-a a season hmasa berah match sarih khelin goal li a khung ta a, assist vawi li a nei bawk.

Mahse, tun hnaia harh thar Blasters lamin tlawm bik an duh lo a, Sahal Abdul Samad chuan minute 27-naah si phurh a sut - hun tawp thlengin goal dang a lut lo a, 1-1 in an ṭin ta a ni.

Jamshedpur tan Laldinliana Renthlei leh Ricky Lallawmawma ten inkhel bul an ṭan - Dinliana hi minute 37-naah a kutin ball a tawh fuh avanga penalty chawi tur ni mah se referee-in a hmu lo a, Durtlang tlangval Ricky-a'n Ishan Pandita tan chance duhawm siamsak mah se Pandita hian a chhawr thei lo.

Blasters lamah K. Lalṭhathanga chuan inkhel bul a ṭan bawk.

Nizan Inkhel Result

Kerala Blasters 1 - 1 Jamshedpur FC

KEB: Sahal Abdul Samad 27'

JFC: Greg Stewart 14'

Zanin Inkhel Tur

NorthEast United 7:30 PM Mumbai City