Highlander an duai bik lo
Tun season Indian Super League-a team hmuhnawm bera chhal ngam chu Mumbai City an ni a, player hliam ngah vanga talbuai ber pawl chu NorthEast United an ni thung - mahse, Thawhṭanni zan khan team pahnih an intawng a, 3-3 in an inhnehtawk.
Team pahnih inkhela player langsar ber chu Deshorn Brown a ni a, Jamaica international hian Highlander tan hattrick a siam a, a team tan point hlu tak a hlawh chhuak.
Major League Soccer thlenga hming lo chher tawh Brown hian minute 29-naah goal a khung ṭan a, mahse, Mumbai tan Igor Angulo (goal hnih) leh Bipin Singh ten an chhanglet a, minute 52 a tlin chuan 3-1 a ni fel der.
Mahse, Khalid Jamil-a enkawl team an beidawng duh lo - Brown -a'n minute 56-na leh 80-naah goal rawn khungin hattrick a siam a, a team tan si phurh a sut zo - Brown hian tun season-ah hliam vangin match nga chauh a la khel a, mahse, goal li khungin assist vawi khat a nei tling ta der.
Highlander tana bul ṭan zingah Mizo player an awm lo a, minute 46-naah Rochharzela luhtir a ni thung. Mumbai City tan Lalengmawia'n hmun pawimawh a chan chhunzem zel a, Vaivakawn tlangval hian minute 90 a khel tluan.
Inkhel Result
NorthEast United 3 - 3 Mumbai City
NEU: Deshorn Brown 29', 56', 80'
MUM: Igor Angulo 33', 52'; Bipin Singh 40'
Zanin Inkhel Tur
Hyderabad FC 7:30 PM Odisha FC
Team Dinhmun
| # | Team | Pld | W | D | L | GF | GA | GD | Pts |
| 1 | Mumbai City | 8 | 5 | 1 | 2 | 20 | 13 | 7 | 16 |
| 2 | Jamshedpur | 8 | 3 | 4 | 1 | 13 | 8 | 5 | 13 |
| 3 | Kerala Blasters | 8 | 3 | 4 | 1 | 12 | 7 | 5 | 13 |
| 4 | Hyderabad | 7 | 3 | 3 | 1 | 12 | 6 | 6 | 12 |
| 5 | ATK Mohun Bagan | 7 | 3 | 2 | 2 | 16 | 15 | 1 | 11 |
| 6 | Chennaiyin | 7 | 3 | 2 | 2 | 6 | 7 | −1 | 11 |
| 7 | Odisha | 7 | 3 | 1 | 3 | 13 | 14 | −1 | 10 |
| 8 | Goa | 7 | 2 | 2 | 3 | 10 | 14 | −4 | 8 |
| 9 | NorthEast United | 9 | 2 | 2 | 5 | 13 | 19 | −6 | 8 |
| 10 | Bengaluru | 8 | 1 | 3 | 4 | 11 | 15 | −4 | 6 |
| 11 | East Bengal | 8 | 0 | 4 | 4 | 10 | 18 | −8 | 4 |