Player-ten puih an ngai - Jurgen Klopp

Liverpool manager Jurgen Klopp chuan Krismas boruak vanglaia Premier League kalpui chungchang a sawi leh ta a, player-te chuan puih an mamawh thu a sawi.

German coach hian December 26-a inkhelh zawh hnu lawka December 28-a inkhelh lehnghal ngai ṭhin chu a sawisel a, thuneitute chu ngaihtuahna seng thar turin a duh.

Klopp chuan, "Hetiang tur a ni lo. Mi tam takin December 26-a inkhelh hi tihdan phunga an lo neih ngheh tawh a nih avangin chhunzawm zel an duh a, hei chu ka pawm - keini pawh boxing day-ah inkhel ila, pawi tihna ka nei lo.

"Mahse, December 26-ah kan inkhel a, December 28-a inkhelh lehnghal a ngai hi chu a buaithlak ve deuh a ni. Ka thil sawi hi thudik a ni a, kan siamrem theih pawh ka ring.

"Ni 26-ah inkhel ila, ni 29-ah inkhel leh mai ila, eng hi nge siamrem harsa em em chu?" tiin zawhna a pe a, match kara chawlh tlem lutuk chu a sawisel.

Liverpool captain Jordan Henderson chuan tumahin player-te an ngaihtuah tak tak loh thu a lo sawi ve tawh bawk.

Reds hi tun Krismas erawh an hahdam a, December 26-a Leeds United nena an inkhel tur chu Covid-19 vanga Leeds an buai avangin an ṭhulh - zanin dar 1:30-ah league match khel turin Leicester City an lenchilh ang.

Zanina Premier League match khelh tura ruahman zingah Arsenal-in Wolverhampton Wanderers an mikhual tur leh Aston Villa-in Leeds United an lenchilh tur chu Covid-19 vangin sawn a ni.

Zanin Inkhel Tur
Crystal Palace 8:30 PM Norwich City
Southampton 8:30 PM Tottenham Hotspur
Watford 8:30 PM West Ham United
Leicester City 1:30 AM Liverpool