Australian Open khel lo tur Thiem

Dominic Thiem chu a banrek hliam a la dam fel thei lo. January thla chawhnu lama khelh tur Australian Open-ah pawh a inlan thei dawn lo a ni.

Kum 28 mi Thiem hi hliam vangin a chawl rei ta hle. Kumin June thla a khelh Mallorca Open hnuah tournament a la khel leh miah lo.

Austrian star hian a hliam vangin US Open nomawi a kawl lai pawh a hum thei lo, world number 3 hial pawh lo ni tawh hi tunah chuan number 15-naah a tla hniam tawh.

Beisei dan chuan Thiem hian January thla tawp a khelh tur Cordoba Open atangin season thar bul a tan ve ang.

Australian Open khel tur player dinhmun chiang lo an awm nual, an zingah hian champion lai leh world number 1 ni bawk Novak Djokovic pawh a tel.

Australia sorkar lamin an rama lut tur chu hripui laka invenna la ngei turin an duh. Djokovic hi vaccine la duh lo zinga mi a nih avangin a dinhmun a la chiang thei lo.

Season hmasa hmeichhe singles finalist Jennifer Brady pawh a inlan dawn lo, ani inlan loh tur chhan erawh a ke hliam vang a ni thung.