Khel Ratna dawng turin Himas Das rawt

Assam sorkar chuan sprinter Hima Das chu India sorkar hnuaia infiamna chawimawina sang ber Khel Ratna Award dawng turin an rawt. Assam sports secretary Dulal Chandra Das chuan June 5 khan Sports Ministry hnenah kum 20 mi Hima Das rawtna hi a thlen a ni.

Hima Das hi January 9, 2000 khan Dhing, Assam-ah a piang a, a pianna hmun hming chawiin 'Dhing Express' hming an vuahsak. Das hi 5ft 6in-a sang a ni a, a rih zawng hi 52 kg a ni. July 12, 2018 khan Tampere, Finland-a neih World U-20 Championships-ah 400m category-ah telin 51.46 seconds lekah a tlan thleng a, gold medal a dawng. Indian sprinter zingah International level-ah gold medal a dawng hmasa ber.

August 2018 thlaa neih Asian Games-ah Hima Das a che ṭha zui a, women's 4×400 m leh mixed 4×400 m ah te gold medal a lak bakah 400m-ah silver a la bawk. Kum 2019-ah pawh Das hian chanchin ṭha a nei zui a, Poznan Athletics Grand Prix, Poland leh Kladno Athletics Meet, Czech Republic-ah gold (200m) a la ve ve a; Nove Mesto, Czech Republic -ah pawh 400m-ah gold medal a la.

September 25, 2018 khan India President hnen aṭangin Arjuna Award a dawng tawh a, tunah Khel Ratna Award a beisei leh mek. Amaherawhchu infiammite tana chawimawina sang ber hi kum khatah pakhat bak an pe meuh lo a, an pek tam ber ṭumin pali an pek chauh avangin dawng erawh a awlsam lo ang.

Kuminah hian Hima Das bakah Rohit Sharma (Cricket), Neeraj Chopra (Javelin throw), Vinesh Phogat (Freestyle wrestling), Manika Batra (Table tennis) leh Rani Rampal (Hockey) te rawt an ni tawh a ni.

India infiammite tana chawimawina dawn 

theihte chu 

i)    Rajiv Gandhi Khel Ratna Award

ii)    Dronacharya Award

iii)    Arjuna Award

iv)    Dyan Chand Award

v)    Rashtriya Khel Protsahan Puraskar