Foxes lakah Liverpool an tlawm

Liverpool tan Mohamed Salah chuan penalty a pet goal lo a, goal ruakah a tauh lut lo bawk - Leicester City lakah 1-0 in Liverpool an tlawm a, tun season-a an vawi hnih tlawmna a nih avangin hmahruaitu Manchester City chu point rukin an phak lo ta.

Foxes tan Ademola Lookman chuan minute 59-naah inkhela goal awmchhun a khung a, King Power Stadium-ah mualneituin target-a shot an neih awmchhun a ni.

Reds tan Salah bakah Jordan Henderson, Alex Oxlade-Chamberlain leh Sadio Mane ten chance duhawm vawi tam an nei a, mahse, Liverpool vanneih zan a ni lo a, an tlawm.

Liverpool-in league match 29 chhung a zawna goal an khung tawh chu tihtawpin a awm ta a, Pathianni zan dar 10:00-ah Chelsea an lenchilh zui dawn avangin a awlsam dawn lo.

Stamford Bridge-a an len zawhah hian an chhuanvawr Salah, Mane leh Naby Keita te chu ram tana AFCON khel turin an feh chhuak tawh ang - Salah hian kum 2021-ah league goal 24 khungin assist vawi 11 a nei.