Zaninah Premier League Guardioa leh Arteta ten khuh hawng dawn

Beiseina, rinna leh duhna bakah ring ngam chiah lo chungin kan nghak fân fan a, tunah chuan kan nghak chhuak ta. Ni 100 chuang Covid-19 vanga an chawlh hnuah Premier League chu zanin aṭangin khelh ṭan a ni leh dawn ta!

Zanin dar 12:45 hian Manchester City khelmualah Arsenal an lenglut dawn. Pep Guardiola leh a thachhang dawltu ni ṭhin Mikel Arteta te an intawn lehna tur a ni a, inkhel hmuhnawm en a beisei ngam ang.

Arsenal hi pakuana ni lai niin season thara European football khelh an la beisei. Champion lai Man City erawh nomawi kawl lai hloh mai tur an nih bakah UEFA hrem hmabak an ni a, league khelh chhunzawm turah FA Cup bak beisei tur lian an nei tawh hran lo.

Pep Guardiola-a'n Manchester City a enkawl tirh khan khatih laia inkhelh chawlhsan hlim Arteta chu thawhpuiah a sawm vat a, Spanish mi an nih ve ve bakah Gunners captain hlui hi English football hrechiang a nihna kha a sawm chhan lian tak a ni.

Etihad Stadium-ah season thum chhung an thawkdun a, inkhel hmuhnawm bik an pho chhuak ṭhin. Pep hian a assistant coach hi hna ṭha tak a hmuh chuan a lawmpui tur thu a sawi ṭhin a, nikuma Gunners an rawn lan pawh khan a kawng a dal lo.

Barcelona manager hlui hian khelmualah chuan a nau lakah hian zahngaihna a lantir a rinawm loh a, team dang an mikhual ṭhin ang bawkin an lo dawngsawng ang - Arteta tan pawh pangchan beisei chi a ni lo ang.

Mikel Arteta-a'n amah chher hriamtu hi a theihnghilh lo a, a nunah hmun pawimawh a chan thu a sawi. Arteta chuan, "Kum 15 mi chauh ka nih laiin Barcelona-ah kan inhmu tawh, khatih lai chuan player ve ve kan la ni. Khang hunlai aṭang tawh khan ka entawn tawh..

"Team enkawl hna ka thawh leh mimal nunah pawh tun thlengin min kaihruai nasa hle. A hnen aṭangin thil tam tak ka zir chhuak a, hun hlimawm leh hrehawm pawh kan lo paltlang dun tawh, min kaihhruai dan hi ka tan chuan hlu tak a ni," a ti.

Spanish manger Arteta hian Guardiola a ni emaw manager dang emaw pawh ni se an khingpui an nih chuan a zah tur thu a sawi a, chutih rualin an hmachhawn turah hlauh an neih loh thu a sawi bawk. North London club hian player hliam langsar an nei rih lo.

Defender rinrawl Aymeric Laporte inhliam kha tun season-a Man City buaina lian tak pakhat a ni. France international hi inkharkhip hma khan a dam tawh, tunah chuan John Stones, Nicolas Otamendi leh Fernandinho te pathum zinga tu ber nge a din pui dawn tih chu zawhna a ni leh tawh zawk.

Coronavirus vangin chawl lo se la chuan Leroy Sane hi season kal laiah kan hmuh a rinawm loh. Sane hliam a dam tawh a, tlarhma sirah Raheem Sterling, Riyad Mahrez leh Bernardo Silva te nen hmun chan an inchuh ang.

Kevin De Bruyne leh Sergio Aguero te hi thlamuanpui tham an ni a, inkawprem sa an nih avangin hripui len hnuah pawh an thiam thil an theihnghilh thut a rinawm loh - Arsenal tlarhnung tan tihsual zeuh neih a pawi thei ang.

•    Coronavirus vanga an chawlh hnua EPL match hmasa ber chu zanin dar 10:30 hian Villa Park-ah Aston Villa leh Sheffield United ten an khel ang.

•    League an khelh chhunawm leh theih nan hian 'Project Restart' an kalpui a, player leh coaching staff chu a khat tawkin hri an kai em tih endik deuh reng an ni.

•    Stadium chhungah entu 'fans' an awm thei dawn lo. Player-te pawh goal an khung a nih pawhin inchibai leh inpawm chunga lawm ang kha tih a rem dawn lo, social distancing zawm tura beisei an ni. Match official kal hnaih luih luih pawh phal a ni lo.

•    Match pakhatah hian mihring 300 vel chauh inhnamhnawih tura ngaih an ni a, an vaiin an hrislena dinhmun endik hmasak vek 

an ni ang.

•     Ball, manager awmna lai bawr, goal ban leh bar, corner flag leh substitution board thlengin damdawi hmanga tih thianghlim tur a ni.

•    Tui in chawlh a awm dawn a, player ten an mahni tuium (bottle) a mi chauh an in ang.

•    March 13 aṭang khan EPL hi chawlh lailawk a ni a, khatih lai khan Liverpool chuan champion turin match hnih chak chauh an mamawh tawh.

•    Arsenal lakah Manchester City an chak lo a nih chuan, tun kar tawpah Liverpool-in an hmelma Everton hneh chungin league champion an nihna an nemnghet thei ang.

•    Stadium pawnah pawh mipui punkhawm phal a ni dawn lo. Season danga mipui lamin an ngaihhlut tak champion kawngzawh pawh neih theih a nih hmel loh a, pungkhawma lawmna ang kha huaihawt an remti dawn lo.