Bengaluru an chak ve ta

Indian Super League match riat zet a zawna an chak zawh tawh loh hnuin Bengaluru an chak ve ta hram a, an beisei a la bo lo tih pholangin Chennaiyin FC chu 4-2 in an hneh.

Chennai club tan Mirlan Murzaev chuan minute lina lekah goal khungin a team hma a hruaipui a, mahse, Bangalore hian Cleiton Silva penalty leh Alan Costa goal hmangin an chhanglet a, goal dang lut loin chawlhlawk hman a ni - Silva penalty hi Jerry Lalrinzuala'n a kut a ball a tawh fuh vanga a chawi a ni a, Mizo tlangval a vanduai.

Chennaiyin lawmin tlawm an duh bik lo - second half ṭan aṭanga minute lina lekah Rahim Ali chuan a khung ve leh a, beiseina thar an nei.

Mahse, Bengaluru-in chak loh an duh lo. Minute 64-naa Sunil Chhetri an luhtir hnuah an khel a nung leh sawt a, Udanta Singh leh Pratik Chaudhari ten goal rawn khung lehin Chennaiyin lamin a chhanletna tur an nei tawh lo a, 4-2 in Bengaluru an chak.

Chennaiyin tan Lallianzuala'n bul ṭan lo mah se bench aṭanga luhtir a ni a, minute 23 chiah khelmualah hun a hman avangin danglamna erawh a thlen thei lo.

Indian Super League chawllh rih a ni ang a, January 2 zan aṭangin khelh ṭan a ni leh ang.

Inkhel Result

Chennaiyin 2 - 4 Bengaluru FC

CHE: Mirlan Murzaev 4'; Rahim Ali 49'

BEN: Cleiton Silva 38' (P); Alan Costa 43' ;Udanta Singh 70'; Pratik Chaudhari 74'