Coppa Italia Final Rome-ah Juve leh Napoli intawng dawn

Zanin dar 12:30 hian Stadio Olimpico, Rome-ah Coppa Italia final khelh a ni dawn a, Italian club lian pahnih Juventus leh Napoli ten nomawi an inchuh ang - Covid-19 vangin a hmunah entu an awm thei dawn lo.

Cristiano Ronaldo awmna Juve hi rinkai zawk chu an ni, chutihrualin semifinal an khelh dan thlir chuan dah san viau bik ngawt a rem lo. Inter Milan hneh chunga tlang thei Napoli hi nem zawk tura ngaih ngawt chi an ni bik lo ang.

Final khelhna tur Stadio Olimpico hi AS Roma leh Lazio te khelmual inṭawm a ni a, Rome khawpuia stadium lian leh hmingthang, mipui 72,698 vel lenna a ni. Team pahnih hian final lut ni se chuan mahni muala inkhel thei tur an ni.

Tun ṭumah hian Napoli chuan an thawnthu hlui an hre chhuak thar leh ang, final an khelh hnuhnung ber chu 2014 kha niin Stadio Olimpico-ah tho a ni. Fiorentina chu 3-1 a hnehin nomawi an chawi, an lawm erawh a kim lo.

Fiorentina leh Napoli inkhel ni mah se Roma fan chuan Napoli ṭantu pakhat chu stadium pawnah silaiin a lo kap a, a hmunah thi nghal lo mah se a hnu lawkah a boral zui. Tun ṭumah hian fans awm thei dawn lo mah se Rome khawpuia match an neih tur hi a boruak a rit dawn tih a chiang.

Juventus coach Maurizio Sarri hi Naples khawpuia piang leh seilian a ni a, team lian a enkawl hmasak ber pawh Napoli a ni. Football khelh dan chi khat, rang tak taka ball inpe chunga attacking game khelh 'Sarriball' hmangin hming a chher.

Napoli aṭangin Chelsea a pan a, tunah erawh Juventus lamah hun a hmang leh tawh thung. Old Lady a enkawl chinah chuan tun ṭum hi nomawi a beisei hmasak ber a ni a, Serie A bakah Champions League-ah beisei an la nei bawk.

Sarri-a'n a club hlui lakah zahngaihna lantir a tum dawn lo a, tun season tir lam an intawn tawhnaah 2-1 a an ngam loh avang erawh chuan an fimkhur a ngai dawn hle. Italian Cup final-a an intawn hnuhnung berah pawh Napoli hi 2-0 bawkin an chak a ni.

Carlo Ancelotti a chhuah hnuah Napoli-in team enkawl turin Gennaro Gattuso an lalut a, league lamah khel ṭha tawk lo mah se Coppa Italia lamah erawh team hriam bera chhal ngam an ni - final lut tur hian goal khat chiah 

an chhuah.

AC Milan a enkawl laiin Gattuso-a'n final-ah Juve hi a ngam lo, Italian manager hian team enkawl hna a thawh hnua final a hmachhawn vawi hnihnaah hian chak ngei a duh tawh dawn. Gattuso chuan, "Football chu sum ni loin hmingṭhatna tur zawk a ni," hlawhtlin a duh thu a sawi.

Napoli hi an tlarhnung a phui vangin fak an hlawh a, zanina an innghahna tur pawh a ni leh ang. Club lian dangte awh rawn defender Kalidou Koulibaly chuan, "Inrintawkna kan nei, a hmawr bawk turin kan inpeih," a ti.

Napoli XI (4-3-3): Alex Meret; Giovanni Di Lorenzo, Nikola Maksimovic, Kalidou Koulibaly, Elseid Hysaj; Elif Elmas, Diego Demme, Piotr Zielinski; Matteo Politano, Dries Mertens, Lorenzo Insigne.

Juventus XI (4-3-3): Gianluigi Buffon; Juan Cuadrado, Leonardo Bonucci, Matthijs de Ligt, Alex Sandro; Miralem Pjanic, Rodrigo Bentancur, Blaise Matuidi; Douglas Costa, Cristiano Ronaldo, Paulo Dybala.