Brighton hnehtu Man Utd hmalam a 'bright'

Manchester United-in Thawhlehni zan khan Amex Stadium an luhchhuah a, Brighton & Hove Albion 3-0 in an sawp. Ole Gunnar Solskjaer-a hoten match hnuhnung 15-ah chak loh an nei lo a, Bruno Fernandes leh Paul Pogba inkawp hnuah an game an nun bawk avangin an phur chho hle.

Kum 25 mi Bruno Fernandes-a'n goal hnih a khung a, Portuguese midfielder goal khung hma hian kum 18 mi Mason Greenwood-a'n goal hmahruai a khung. Leicester City, Arsenal leh Wolverhampton Wanderers laka point hlawh chhuak thei Seagulls lakah United an khel ṭha takzet.

Norwegian manager Solskjaer-a'n a player thlan dan aṭangin season thara Champions League khelh phak a ngai pawimawh tih a rawn pholang a, an ṭhat dan berin Brighton an hmachhawn.

Goalkeeper David de Gea hmaah Aaron Wan-Bissaka, Victor Lindelof, Harry Maguire leh Luke Shaw te an awm a, Nemanja Matic leh Paul Pogba te midfield-ah an inkawp. Anthony Martial-a'n number 9 hna a chelh a, French striker hnungah hian Bruno Fernandes, Mason Greenwood leh Marcus Rashford te an awm. Minute 90 chhunga Norwich hneh thei lo Solskjaer-a hoten chetsual nawn an tum lo.

United-in Norwich nen mualsir lam an hmang ṭha tawk lo a, Seagulls nen erawh a dang tawh. Minute 5-na lekah Maguire-a ball vawrh chu Wan-Bissaka-a'n la lutin Greenwood leh Pogba te an inrawlh hnuah Fernandes-a'n goal ban a pet per.

United-in dinglam aṭangin an nawr chhunzawm a, United academy chhuak Greenwood chuan Brighton captain Lewis Dunk hmaa inthlahrung miah loa a 'step over' hnuah a ke vei lamin a pet goal. English rawlthar hian tun season Premier League-ah goal ruk a khung tling der tawh.

Mual vei lam aṭang pawhin United an hlauhawm tho. Shaw leh Rashford te ṭha taka an inthlawp hnuah English left back cross chu Pogba-a'n chang fuhin Fernandes pet turin a siamsak a, Portuguese midfielder hian minute 29-naah

United goal hnihna a khung.

Minute 50-naah United-in goal thumna an khung a, an counter attack rang tak chu hmuhnawm tham a tling. Box chhung aṭanga Maguire-a ball tauh chhuah chu Matic-a'n mual vei lamah volley nghalin Greenwood-a'n chak takin a la phei a, English rawlthar cross chu Fernandes-a'n a volley goal. United-in goal khung turin second 12 vel lek an mamawh a, a tawp khar nan Fernandes-a'n a class sang tak a rawn pholang bawk.

Manchester United leh Tottenham inkhelh ṭumin goalkeeper De Gea-a'n ho lam takin a chhuah a, heti chung hian manager Solskjaer-a'n Spanish keeper hi a chhan ngar ngar. Norwegian manager hian De Gea hi khawvela keeper ṭha ber a nih thu a sawi a, Atletico Madrid keeper hian a pu rinna chu khelmualah a chhanglet.

Brighton lakah De Gea-a'n hna a nei meuh lo a, amaherawhchu second half-ah save ṭha pahnih a nei. Spanish keeper hian Brighton forward Aaron Connolly leh Neal Maupay te goal khung tur a dansak. United number 1 keeper hian tun season league-ah vawi 10 clean sheet a nei tawh a, season ṭha ber hmang lo mah se hmahruaitu Nick Pope a phak lohna chu clean sheet vawi thum chauh a ni.

Sir Alex Ferguson-a'n manager hna a chawlhsan hnuah United-in manager hrang hrang David Moyes, Louis van Gaal leh Jose Mourinho te an hrawn chho a, beiseina chu nei ṭhin bawk mah se football hmuhnawm khel loin beiseina a thamral leh ṭhin. 

Solskjaer hnuaiah United-in beiseina an nei thar a, match 15 chhung hneh loh an tawn tawh loah hian goal 38 zet an khung. Season liam ta khan United hian match hnuhnung pasarihah vawi khat chauh an chak a, parukna niin season an khar. 

Kuminah erawh vawi khat chu an chak ta phawt. Match ruk khelh hmabakah Solskjaer-a hoten Bournemouth, Aston Villa, Southampton, Crystal Palace leh West Ham United te an la hmachhawn dawn a, Champions League khel tura an elpui an hmachhawn dawn tawh lo.