Klopp-a'n Chelsea hmachhawn thei dawn lo

Liverpool manager Jurgen Klopp chu Covid-19 kai rinhlelhawmin a awm a, zanin dar 10:00-a Chelsea an lenchilh hunah Reds a ho thei dawn lo - Blues tan thu lawmawm a tling.

Kum 54 mi coach hian Covid symptoms chu na lutuk loin a nei a, a inkhunghrang mek. Hetiang a nih avang hian Stamford Bridge-ah a assistant Pep Lijnders chuan Liverpool hi a kaihruai dawn a ni.

Klopp bakah hian coaching staff dang pathum chu hri kai rinhlelhawmin an awm a, anni pawh an inkhunghrang ang. Zirtawpni khan Klopp chuan a player pathumin hri leng an kai thu a lo sawi tawh bawk.

Reds hian hliam vangin Thiago Alcantara, Divock Origi, Takumi Minamino, Nat Phillips leh Harvey Elliott an chhawr thei lo mek bawk a, heti chung hian Klopp-a'n inkhel tur sawntir tumna erawh a nei rih lo.

Merseyside club hi Premier League table-ah pathumna an ni mek a, zanina an hmachhawn tur Chelsea aia match khata khel tlemin Blues hi point khatin an phak lo a, hmahruaitu Manchester City aia match hniha khel tlemin Pep Guardiola team hi point 12-in an phak lo mek bawk - champion an tum chuan Blues khelmualah chak ngei ngei an mamawh.

Liverpool hian January 6 zanah Carabao Cup semifinal khel turin Arsenal an mikhual dawn bawk a, he hunah pawh hian Klopp hian a team a la ho thei kherin a rinawm loh.

Zanin Inkhel Tur
Brentford 7:30 PM Aston Villa
Everton 7:30 PM Brighton & Hove Albion
Leeds United 7:30 PM Burnley
Chelsea 10:00 PM Liverpool