Magpies-in Trippier an duh

Saudi Arabia aṭanga hausakna an neih hnu pawha result nei ṭha thei lo Newcastle United-in thlasik transfer bazar atan an mit an len ṭan a, Atletico Madrid defender Kieran Trippier chu lakluh tumin an dawr mek.

England right back Trippier hian kum 2019 khan Tottenham Hotspur aṭangin Atletico hi pound maktaduai 20-in a zawm a, inelna hrang hrangah match 83 a khelhsak tawh a, season hmasa khan Spanish La Liga-ah a champion pui.

Newcastle manager Eddie Howe hnuaia Burnley tana lo khel tawh defender hian Premier League-a kir a hreh lo a, mahse, nipui lai khan Manchester United leh Arsenal ten duh mah se Atletico phalna zat, pound maktaduai 51-a lei chhuah an ngam lo.

Euro 2020 final-a England hruai thlengtu zinga mi defender hian St. James' Park-a khelh a hreh lo a nih chuan Magpies tan a man zat hi buaina tur a awmin a lang lo - sum an ngah miau alawm!

Trippier-a khelhna Atletico hi Krismas chawlh an hman hnuah zanin La Liga-ah an inlan ve leh dawn a, zan dar 8:45-ah Rayo Vallecano an hmachhawn ang. December 31 zan khan Krismas hnua La Liga match hmasa ber chu khelh a ni a, Espanyol chuan an mikhualna ramah Valencia chu 2-1 in an hneh. Valencia tan Omar Alderete chuan goal hmahruai khung mah se Hugo Duro hnawhchhuah (penalty a chawi) a nih hnuah Raul de Tomas (penalty) leh Javi Puado chuan Espanyol tana chhangletin an chak.

Zanin Inkhel Tur
Getafe 06:30 PM Real Madrid
Atletico Madrid 08:45 PM Rayo Vallecano
Elche 08:45 PM Granada
Alaves 11:00 PM Real Sociedad
Real Betis 11:00 PM Celta Vigo
Real Mallorca 01:30 AM Barcelona