Arsenal lakah Saint-Etienne an lawm lo

French Ligue 1 club Saint-Etienne chu defender William Saliba chungchangah Arsenal lakah an lawm lo hle. An player ni ṭhin, tuna loan hmanga an hawh lai hi French Cup final-ah an chhawr thei dawn lo a ni.Nipui hmasa bazar lai khan Gunners hian kum 19 mi defender hi pound maktaduai 27 bawrin an lei. Club pahnih inrem dan chuan season khat chhung chu Ligue 1-ah loan hmangin a khel zui leh ang, tih a ni - an inrem dan ang hian an kal thlap.

France under 20 international hian Saint-Etienne tan match 17-ah inkhel bul a ṭan thei a nih chuan a man atan pound maktaduai 2.5 vel bawr an pek belh a ngai dawn. Tunah match 16 chu bul ṭantu zingah a tel tawh, French Cup final-ah a tir aṭanga a khel a nih chuan Gunners lamin pawisa an pek belh a ngai dawn.

Gunners manager Mikel Arteta pawhin a tirah chuan Saliba hi French Cup final khel turin a duhsak thu a sawi tawh a, tun hnaiah erawh thu dang a awm leh ta si - French club lamin an lungawi loh thu an au chhuah pui.

North London club erawhin an player hi training neih pui an nghahhlelh tawh thu an sawi ve thung, pawisa aiin season thar atan inbuatsaihna ṭha tak lo nei hman se an duh thu an sawi a ni.