Wimbledon khelh loh vangin pawisa lama buaina a tam lo

All England club chief Executive Richard Lewis chuan Wimbledon khelh loh vangin sum leh pai lamah harsatna lian tham a awm loh thu a sawi a, nghawng na lutuk nei loa an insiamrem theih mai a beisei.

Covid-19 vangin infiamna khawvel a buai a, Indopui II-na hnua a vawi khat nan Wimbledon chu ṭhulh a ni. Wimbledon bakah hian grass court inelna zawng zawng pawh kalpui theih a ni lo. August thla maia CEO hna chawlhsan tur Lewis chuan, “Sum chu kan hloh ngei dawn, mahse nasa takin min nghawng lo ang. Inelna kan buatsaih loh hian nunna kan chhanhim a, tournament vangin hrikai tam tak lo awm ta se, chumi damlo enkawlna tur pawisa chu a hautak zawk thei,” a ti.

Tennis season kal laia Grand Slam pali zingah Australian Open chiah an la khel, a hmuna entu awm loin US Open khelh an tum. French Open erawh fans awm chunga khelh theih an beisei.