Liverpool lakah Chelsea an 'comeback'

Pathianni zanah Premier League inkhel hmuhnawm entirin kan awm a, Liverpool lakah 2-0 in hnufual zet mah se Chelsea an comeback a, Stamford Bridge-ah Reds nen 2-2 in an inhnehtawk.

Liverpool tan Sadio Mane leh Mohamed Salah-ten minute 30 hmain goal hnih an khung fel der a, London khawpuiah Reds hi awlsam takin an chak dawn niin a lang hman.

Mahse, Chelsea tan Mateo Kovacic leh Christian Pulisic ten chawlhlawk hmain goal ropui hmangin an chhanglet a, hun tawp thlenga goal dang lut loin point an insem.

Chelsea leh Liverpool inhnehtawk avanga lawm ber erawh Manchester City an ni a, an elpui club pahnih an inhnehtawk avangin table-ah point 10 zetin hma an hruai fal ta.

Mangṭha Lukaku?
Tun hnaiah Blues striker Romelu Lukaku-a'n Stamford Bridge-ah a hlim loh thu a sawi a, a club hlui Inter Milan a ngaih thu thlengin a sawi - Lukaku thusawi vangin Thomas Tuchel a lawm lo.

Chelsea boss hian namnul chi a ni lo tih pholangin pound maktaduai 97.5 man striker hi squad-ah pawh a telh lo a, tlarhmaa a hmanraw neih hriam ber tel loin an elpui team a hmachhawn.

Mahse, Liverpool hi an ṭhat dan berin an khel bik lo. Player pawimawh keeper Alisson, forward Roberto Firmino leh defender Joel Matip te chu Covid-19 an kai a, an inlan thei lo.

Liverpool boss Jurgen Klopp pawhin Covid-19 vang thoin a team a ho thei lo a, assistant coach Pep Lijnders chuan a hmun ruak a luah.

Hei le Liverpool
Reds-in coach tel loin an khel tih hriat loh lekin Chelsea an nawr nghal a, minute kuana lekah Mane-a'n Senegal tana a khelhpui keeper Edouard Mendy chu duhthala bumin goal hmahruai a rawn khung.

Mane hian inkhel ṭantir lamah red card hmuh theihna a nei a, mahse, Chelsea captain Cesar Azpilicueta a nghawk chungin yellow card chiah a hmu - a vanneih a kaltluang a, goal a khung zui.

Liverpool-in an duhtawk mai lo. Player thiam bik Salah-a'n mawi zeta Marcos Alonso a bum hnuah goal ṭha bik a khung a, tun season match 26 a khelhah goal 23 khungin assist vawi kua a nei ta.

Salah hian English club tan goal 150 a khung tling ta bawk a, Reds tan goal 148 khungin Chelsea tan goal hnih a khung ve hman - goal mamawh Chelsea fan-ten Lukaku an ngai ṭan a, Tuchel-a 'thununna' chu a hun lo em ni aw, tih rilruah a awm hman.

Chelsea tak tak
Fans tam tak ngaihdanah Liverpool chu chak chiangsa an ni a, Chelsea lamin ngaihdan dang an nei thung. Croatian midfielder Kovacic-a'n minute 42-naah volley hmangin goal mawi bik a khung a, Chelsea an phur sawt.

Goal hniha hma an hruai hnu pawha an khelh dan thlak lo Liverpool-in an game 'inhawng' lutuk chu an tuar zui a, first half hun pek belhah Pulisic chuan si phurh a rawn sut zo der - goal dang erawh a lut tawh lo.

Liverpool tan Alisson aia lut Caoimhin Kelleher a langsar a, kum 23 mi keeper hian Pulisic-a shot chu vawi hnih ngawt ṭha zetin a dansak a, hmabak a nei êng tih a lang.

Chelsea keeper Mendy sawi hmaih a thiang lo - Liverpool passing mawi tak hnua Mane shot a dante chu a ṭha takzet a, a tawpah City lawm nan team pahnih an inhnehtawk.