Chennaiyin-in Jamshedpur an hneh

Kumthar chawlh an hman hnuah Indian Super League pawh khelh a ni ve leh ta a, Pathianni zan khan match hnih a awm - Chennaiyin chuan 1-0 in Jamshedpur FC an hneh.

Chennai club tan Lukasz Gikiewicz chuan minute 31-naah inkhela goal awmchhun a khung a, an chak. Chennaiyin tan Jerry Lalrinzuala chuan inkhel bul a ṭan a, Lallianzuala Chhangte chu minute 74-naah bench aṭanga luhtir a ni bawk.

Jamshedpur lamah Laldinliana Renthlei leh Ricky Lallawmawma ten inkhel bul an ṭan ve ve a, an team tan point erawh an hlawh chhuak zo lo.

Pathianni zan inkhel hmasa zawkah Kerala Blasters leh FC Goa chu 2-2 in an inhnehtawk a, Goan club-in vawi 21 zet shot nei mah se goal hnih chiah an khung thei.

Blasters tan Jeakson Singh leh Adrian Luna ten minute 20 chhungin 2-0 in an team hi hma an hruaipui hman a, mahse, Goa lamin na takin an nawr let.

Indian coach Derrick Pereira enkawlna hnuaia khel team tan hian Jorge Ortiz leh Edu Bedia te chuan minute 40 pawh a tlin hmain an si phurh an sut zo a, goal dang erawh an khung theih loh avangin an inhnehtawk.

Blasters tan K. Lalṭhathanga chuan inkhel bul a ṭan a, Bethlehem Vengthlang tlangval hi minute 74-naah lakchhuah a ni thung.

January 2, Pathianni Zan
Kerala Blasters 2 - 2 FC Goa
KEB: Jeakson Singh 10'; Adrian Luna 20'
FCG: Jorge Ortiz 24'; Edu Bedia 38'

Jamshedpur FC 0 - 1 Chennaiyin FC
CHE: Lukasz Gikiewicz 31'

Zanin Inkhel Tur
Bengaluru 7:30 PM East Bengal

Team Dinhmun
# Team Pld W D L GF GA GD Pts
1 Mumbai City 8 5 1 2 20 13 7 16
2 Hyderabad 8 4 3 1 18 7 11 15
3 Kerala Blasters 9 3 5 1 15 10 5 14
4 ATK Mohun Bagan 8 4 2 2 18 16 2 14
5 Chennaiyin 9 4 2 3 9 11 -2 14
6 Jamshedpur 9 3 4 2 14 10 4 13
7 Odisha 8 3 1 4 14 20 -6 10
8 Bengaluru 9 2 3 4 15 17 -2 9
9 Goa 9 2 3 4 13 18 -5 9
10 NorthEast United 9 2 2 5 13 19 -6 8
11 East Bengal 8 0 4 4 10 18 -8 4

*Nizan Mumbai City leh Odisha inkhel result a zirin table hi la danglam leh thei a ni.