Messi-a'n hripui a kai

Lionel Messi leh Paris St-Germain player dang pathum chuan Covid-19 an kai tih hmuhchhuah a ni. PSG player-te hi an awmna hmunah ṭheuh khung hran nghal an ni a, nizana Vannes nen French Cup an khelhah an inlan thei lo.

Messi bakah hian Juan Bernat, Nathan Bitumazala leh Sergio Rico te chu hrikai niin, kumina league match an khelh hmasak ber turah erawh an lan hman mai thei - January 10 hian Lyon an lenchilh dawn a ni.

PSG manager Mauricio Pochettino chuan, "Messi hi Argentina-ah a la awm, a negative hunah Paris lamah a lo kir chauh ang," a ti a, a player pawimawh kir hun tur tak erawh a sawi chiang nghal thei lo thung.

Messi bakah hian Neymar chu inkhel thei loin a chawl mek. Brazil international hi kerek hliam vanga chawl lai a ni a, tun thla tawp lamah chuan training pangngai a zawm theih tawh beisei a ni.