Arsenal natna Man City lawmna

Premier League champion lai Manchester City chian sawi hlawh takin Arsenal 2-1 in an hneh. Pep Guardiola naute hian pahnihna Chelsea aiin point 10 zetin an hmu hnem tawh a, nomawi humhim turin an dinhmun an sawhnghet ta hle.

January 1, Inrinni zan Emirates Stadium-a inkhelah Bukayo Saka goal khung chu Riyad Mahrez-a'n penalty aṭangin a sut a, hun tawp hma chiahin midfielder Rodri chuan chakna goal a khung.

Mikel Arteta-a'n hri leng a kai avangin a naute a ho khawm thei lo a, an khelh dan erawh a hnuhawm tho. Gunners thiam dan taka ball an inpek kual hnuah Kieran Tierney-a ball pek chu laklawh nei miah loin Saka-a'n a chhuih lut.

Goal an khung hma pawhin Man City tlarhnung an chhaih buai fo. Martin Odegaard a tih tluk vangin Ederson chuan penalty a chawi dawn niin a lang, mahse VAR hmanga an en hnuah penalty an pe lo.

Granit Xhaka-a'n Bernardo Silva a tih tluk chu referee Stuart Attwell-a'n a tirah penalty a pe lo, khelmual sira monitor kaltlanga VAR a hman hnuah penalty a pe leh hnuhnawh a, penalty pet tur ball lo khawihtu Gabriel chu yellow card pek a ni bawk.

Mahrez-a'n penalty a khung a, boruak a nung chhunzawm. Man City goal nawr tur dan a tumna lamah Gabriel hian Gabriel Jesus ti tluin yellow card pahnihna a hmu chhunzawm zui a, minute 59-naah hnawhchhuah a ni.

Gabriel Martinelli-a'n defender ṭha Joao Cancelo paltlang thei viau mah se goal ruak a khung lo. A tawpah tawnhriat nei ṭha leh huaisen zawk Man City lamin point thum an hlawh chhuak.

Inkhel pumpui tlirin, a bik takin first half-ah phei chuan Arsenal an chungnung zawk. Mahse, a tawpa point hmu zawk chu Guardiola naute an ni a, champion rim a nam leh ṭan. Chak lo Gunners tan erawh palina nih chhunzawm zel pawh a awlsam dawn lo.