Kim loa bul ṭan Aizawl FC an chak lo ; Covid-19 vangin I League an chawl

Tun season I League chu December 26, Pathianni khan West Bengal-ah khelh ṭan a ni a, Aizawl FC-in December 27, Thawhṭanni khan an match hmasa berah Real Kashmir hmachhawnin 3-2 in an hneh lo.

Mizo club hian player registration fel loh avangin an match hmasa berah hian player pawimawh an chawr thei lo. Covid-19 vangin I League khelh chhunzawm theih a ni lo a, round khatna khelh zawh hian chawlh rih a ni.

Goal 5 a lut
Aizawl FC-in champion pui thei tur khawpa squad ṭha an kawl a, amaherawhchu match hmasa berah player registration a fel loh avangin Mizoram player hlangin an khel.

Real Kashmir lamin foreigner nei lo Aizawl FC lakah an lenna an hman ṭangkai an tum a, an hlawhtling. Mizo player pathum awmna Real Kashmir hian Tiago Adan hmangin minute riatnaah hma an hruai a, Aizawl FC tan Lalṭhakima'n minute 38-naah siphurh a sut.

Mizo club khel ṭha mah se Kashmir-in chak an phu zawk a, Tiago Adan-a'n first half injury time-ah a khulh belh bakah Mason Robertson-a'n minute 66-naah a khung belh. Mizo tlangvalte an beidawng lo a, minute 85-naah Ramhlunchhunga hmangin siphurh an sut ṭhen a, goal dang a luh belh tawh lo.

An kim lo
India ramin FIFA kalphung an zawm a, I League leh Indian Super League pawh ni se transfer hun pangngai tho hman a ni. Aizawl FC pawhin December thlaa player chhawr tur chuan nipui transfer-a ziahluh hman a ṭul.

Hemi a nih avang hian Mizo club-in inelna ṭan hmaa an player lakluhte an match hmasa berah an chhawr thei lo. Player chhawr theih loh zingah defender pathum Olimjon Karimov, Lalhmunmawia leh Jone Lalṭhakima te an tel.

Midfield-ah Bazie Armand, Samuel Lalmuanpuia, Rinreithan Shaiza leh Ṭhasiama te an tel lo a, tlarhmaah player langsar Willis Deon Plaza leh Aser Pierrick Dipanda Dicka te bakah Jakob Vanlalhlimpuia, Nikhil Rajendra Mali leh Lalremruata te an chhawr thei lo.

Aizawl FC-in player 12 ngawt an chhawr thei lo a, result thlak danglam thei tur an nih avangin player registration tih fel hman loh vangin point thum an hlohah a ngaih theih. Mizo club chauh hi registration-a buai an ni lo, Rajasthan United phei chuan match hmasa berah player pakua chauh an khel a, Punjab lakah 2-0 in an chak lo.

Covid-19 buaina
Hri leng vangin West Bengal a buai a, I League-ah nghawng lian tak a nei. Aizawl FC player zingah Covid-19 hri kai pahnih S.R. Lallawmawma leh Melory Laldinsanga te an awm a, tunah chuan an dam fel tawh. I League thuneituten Covid-19 hri kai dan hi an puangzar lo a, Mizo club hi an buai lo ber zinga mi an ni zawk.

Aizawl FC manager Anand Gurung chuan, "December 28 khan manager's meeting kan nei a, Covid-19 vangin ni 10 chhung chu I League khelh chhunzawm theih a ni dawn lo tih min hriattir. Tunah pawh hian I League khelh chhunzawm hun tur hriat a la ni lo a, West Bengal sorkar thuchhuak pawh ngaihchan a nih a rinawm," tiin Vanglaini a hrilh.

I League hi January 10 hnu lamah chauh khelh chhunzawm theih a nih a rinawm a, fixtures pawh siam ṭhat a ṭul ang. Anand Gurung chuan, "Kan player positive-te an negative tawh a, contact tracing vanga result nghak lai erawh an awm thung. Mizo mipuite ṭawngṭaipuina kan ngen e," tiin a sawi a, I League khelh ṭan a nih leh hunah chuan kim ṭhapa an khelh theih a beisei thu a sawi.

December 26, Pathianni
Trau 0 - 0 Indian Arrows
Gokulam Kerala 1 - 0 Churchill Brothers
GOK : Sharif Mukhammad 16' (P)
Rajasthan FC 0 - 2 RoundGlass Punjab
PUN : Kurtis Guthrie 27'; Aphaoba Singh Ashangbam 90'

December 27, Thawhṭanni
Neroca 3 - 2 Shreenidi
NER : Sergio Mendigutxia 16', 22', 50'
SRE : Girik Khosla 41'; David Castaneda Munoz 59'
Real Kashmir 3 - 2 Aizawl FC
REA : Tiago Adan 8', 45+2'; Mason Robertson 66'
AFC : Lalṭhakima 38'; Ramhlunchhunga 85'
Mohammedan SC 2 - 1 Sudeva Delhi
MOH : SK Faiaz 13'; Marcus Joseph 53'
SUD : Abhijit Sarkar 90+1'