Djokovic a la inkhel rih lo

January 17 aṭangin Australian Open khelh a ni dawn a, tun thlengin mipa singles champion lai Novak Djokovic dinhmun a la chiang thei lo. World number 1 hi Sydney khawpuia khelh lai ATP Cup aṭang pawhin a chhan hriat lohin a inhnukdawk.

Australian Open khel turin hripui leng laka invenna lak ngei a ngai, vaccine an la lo a nih chuan an lak loh chhan chu taksa hriselna ṭhat loh vang emaw a nih a ngai, a nihna takah chuan invenna lak ngei a ngai tihna a ni.

Serbian star Djokovic hi vaccine la duh lo zinga mi a ni a, tun thlenga tournament khelh a tum tur thu a la tih chian loh avangin a chanchinin ngaihven a hlawh - tun kar chhung chuan a dinhmun tih chian a ngai ang.

Australian Open director Craig Tiley chuan, "Tun kar tawp thleng hian pawimawh bika hman tur thlawhtheihna kan nei, kar tawpah chuan Australian Open khel tur chu an kim tawh ang," tiin a sawi.

Australia sorkar hi hripui leng chungchangah a kal fawr hle a, tun hma pawhin infiammi bakah mipuite chu thupek zawm ngei turin a lo ti fo tawh bawk - Djokovic tan pawh ngaih hnathiamna pek an tum lem lo niin a lang.

Rafael Nadal erawh season khat chhunga Grand Slam hmasa ber khel turin a inbuatsaih. Hard court inelna lian neihna hmun Melbourne Park a thleng tawh a, a vawi hnih nan champion tumin tha a thawh dawn.