German lakah Britain an chak

ATP Cup khelh laiah Great Britain chuan Germany 2-1 in an hneh, chak tur zawk tih chian nan doubles khelh niin Dan Evans leh Jamie Murray te ṭangdun chuan hnehna an chang a ni.

Evans leh Murray te ṭangdun hian Alexander Zverev leh Kevin Krawietz te inkawp chu 6-3, 6-4 in an hneh. Great Britain hian an match lehpekah chuan Canada an hmachhawn leh ang.

Singles match khelh hmasak niin, Evans-a'n Jan-Lennard Struff 6-1, 6-2 in a hneh. World number 3 Zverev-a'n 7-6 (7-2), 6-1 a Cameron Norrie hnehin ram pahnih te 1-1 in an inhnehtawk chiah a, doubles hmanga chak zawk zawn a nih hnuah Germany an vanduai.

British number 1 Evans chuan, "Kum 2022 bul ṭanna ṭha leh duhthusam a ni. Training kan neih ṭhat avangin court chhungah a takin ṭha takin kan khel thei," tiin a sawi a, an khelh leh hmabakah beiseina an neih san thu a sawi bawk.

ATP Cup hi vawi thum an neihna a ni a, ram 16 inlanin group hran hranah an ṭhen darh. Sydney khawpuia hmun pahnih Ken Rosewall Arena leh Qudos Bank Arena-ah te khelh a ni.

Inkhel dangah Daniil Medvedev chu singles match-ah chak lo mah se, doubles leh singles match pakhat zawkah Russia an chak avangin France chu 2-1 in an hneh. United States chuan Canada 3-0 in an hneh ve bawk.