Watford chungah Senegal an lawm lo

Senegal Football Federation (FSF) chuan an player Ismaila Sarr chu Africa Cup of Nations (AFCON) khel turin ko mah se Watford-in an dang tlat niin an sawi a, Premier League club hian he puhna hi an pha thung.

Kum 23 mi forward hi November aṭang khan hliam vangin a chawl tawh a, Senegal football thuneitute chuan, "FSF chuan Watford-in in zah lohna, in tham lohna leh inthliarna langsar tak lantir a, ram tana inlan tura player an dang tlat hi a dem takzet a ni," an ti.

Hetihlai hian Watford chuan an player dinhmun chu chiang taka Senegal an hrilh thu an sawi a, "A hliam dinhmun leh a chawlh hun tur thlenga tarlangin kan hrilh a ni," an ti a, Senegal Football Federation chu an player dinhmun chu anmahni surgeon ngei hmanga en dik tura an ngen thu an sawi bawk.

Watford hian tun season Premier League-a goal riat khungtu Emmanuel Dennis chu Nigeria squad-a awm an lo rem ti lo tawh bawk a, coach Claudio Ranieri chuan Nigeria FA leh club thuneitute inbiakna anga thutlukna siam a nih thu sawi mah se Nigeria hian Watford chu ṭang ruh tlatah an puh thung.

Hetihlai hian Napoli striker Victor Osimhen chuan AFCON a khel thei dawn lo bawk a, kum 23 mi striker hian hripui a kai bakah November aṭang khan hliam vangin a inlan tawh rih lo.