Bundesliga-ah Bayern an champion

Stadium ruakah Bayern Munich-in a zawna a vawi riat nan Bundesliga nomawi an chawi a, season liam taa Allianz Arena-a entu 75,000 hmaa an champion boruak nen khaikhin rual ni lo mah se an ropuina erawh sawi nep theih a ni lo.

Weserstadion-ah Bayern an lenglut a, minute 43-naa Robert Lewandowski goal hmangin Werder Bremen 1-0 in an hneh. Hans-Dieter Flick hoten match 32 aṭangin point 76 an hmu a, anmahni hnaih bertu Borussia Dortmund-in an umpha thei tawh lo.

Werder Bremen-in Bayern an hmachhawn hmain khualmualah Paderborn 5-1 zetin an sawp a, an inrintawk lai tak a nih avangin Bavarians hna a awlsam lo. 

Minute 43-naah mi bik Lewandowski a rawn lang a, Bayern defender Jerome Boateng-a'n fing taka a vawrluh chu Polish striker hian a awm hmanga la thlain goal-ah a hlap lut.  Lewy hian champion-na goal khung turin striker ṭha bik a nihzia a pholang a, ball hmu tura Bremen offside trap a bum dan chu hmuhnawm a tling. 

Bayern hian inkhel an thunun hret a, mual vei lam aṭangin Alphonso Davies leh Kingsley Coman te hmangin an nawr na hle. Tlarhnungah Boateng-a hoin an ding khawng a, midfield-ah Joshua Kimmich a thawhrim bawk avangin Bayern-in point thum hmuh an phu.

Amaherawhchu minute 79-naah Alphonso Davies hnawhchhuah a ni a, player 10-a an khelh avangin hun tawp lam a harsat phah. Minute 90-naah Manuel Neuer-a'n theihna sang tak a la nei tih lantirin Yuya Osako ball tauh chu ṭha takin a dang a, Bayern an ṭang tluan.

Bayern Munich-in Niko Kovac hoin season bul an ṭan a, Bundesliga club ṭha zinga mi an ni a, nomawi humhim lo thei dinhunah a ding. Bavarians-in November 2 khan  5-1 zetin Eintracht Frankfurt an hneh lo a, hetihlaia hmahruaitu Borussia Monchengladbach chu point liin an pha lo.

Bayern-in manager lailawk atan Flick an ruai a, danglamna an thlen. Season a tawp lamah meuh chuan Bayern chu Bundesliga club ṭha ber an ni leh tawh a, club dangin an elpha lo. Bavarians boss Flick chuan, "Thla engemaw chhung kan football khelh dan hian minti lawm hle. Team tana kan inpekna te, nuam tia kan inkhel te leh kan team boruak ṭha tak te hi ka chhuang hle," tiin a sawi.

•    Bayern Munich hian league (30), DFB Pokal (19), DFB/DFL-Super Cup (7) leh DFL-Ligapokal (6) ah te champion tam lamah record an siam vek.

•    Europe-a mahni league thunun, champion hnem lamah Bayern hian Juventus (Serie A-ah 35) leh Real Madrid (La Liga-ah 33) te chiah an tluk lo.

•    Bayern-in league nomawi an chawi hmasak ber chu 1931-32 season a ni a, Bundesliga awm hma a ni. Kum 1963 aṭangin Bundesliga khelh ṭan a ni a, Bayern hian 1968-69 season khan champion ṭanin tun hi vawi 30 an champion-na chiah a ni.

•    Bayern hian league nomawi a zawnin vawi riat an chawi a, tun hnaiah Bundesliga an thunun hneh hle. Bavarian hmaa champion chu Borussia Dortmund an ni a, Jurgen Klopp-a hoin 2010–11 leh 2011–12 season khan an champion.

•    Bayern hi Hans-Dieter Flick kaihhruaina hnuaiah treble champion thei dinhmunah an ding. DFB Pokal-ah final an lut tawh a; July 4, Inrinni zanah Bayer Leverkusen nen nomawi an inchuh ang. Champions League-ah last 16 lutin first leg-ah Chelsea 3-0 in an hneh a, an chakna hmun hi Stamford Bridge a ni.

•    Bayern keeper Manuel Neuer-a'n match zawng zawng a khel kim vek. Joshua Kimmich-a'n match 31 a khel a, Benjamin Pavard (30) leh Robert Lewandowski (29) te an inlan hnem bawk.

•    Polish striker Robert Lewandowski-a'n goal 31 a khung a, Bundesliga top scorer a ni mek. Tun season inelna hrang hrangah goal 46 a khung tawh. 

•    David Alaba leh Thomas Muller te a vawi kua nan Bundesliga-ah an champion a, season liam taa Franck Ribery record an nih rual chiah.

•    Hansi Flick hi Bayern tana player leh manager ni chunga Bundesliga la thei pathumna a ni a, Franz Beckenbauer leh Niko Kovac te hnung a zui. Flick hian player ni chungin 1985-86, 1986-87, 1988-89 leh 1989-90 khan Bayern a champion pui tawh a ni.

•    Bayern second keeper Sven Ulreich hian tun season Bundesliga-ah a la inlan lo. Chutihrualin German keeper kum 31 mi hi a khelhna club a fuh miau avangin Bundesliga-ah vawi nga a champion tawh a ni.