99% a tawk lo - Solskjaer

Manchester United-in Covid-19 vanga buaina an vanneihpui tiha sawi theih dan a awm. Hripui vanga inkhelh theih loh chhungin Paul Pogba leh Marcus Rashford te an dam hman a, January thlaa an lakluh Bruno Fernandes leh Odion Ighalo te ho nen inelna ṭan hmain training mumal tak an nei thei bawk.

United boss Ole Gunnar Solskjaer chuan, "Ka player-te hi an khelh ṭhat avangin inrintawkna a ngah phah hle. Kan team-ah hian theihna a awm a, player-te dinhmun a ṭha a, inelna hmachhawn turin kan inpeih," tiin a naute a fak.

Goal khungtu Mason Greenwood leh Bruno Fernandes te chungchang sawi zuiin Solskjaer chuan, "Greenwood hian Brighton laka a goal khung ang khung tur khan theihna a nei sa hrim hrim. Chutihrualin lockdown a hmang ṭangkai a, a taksa ti lianin a chak sawt. A hmuhnawm chho zel ang.

Game thlak danglam thei tur hi player pakhat aia tam ka nei. Player ṭha tak tak ka kawl a, Bruno Fernandes hi chutiang zinga mi chu a ni. Chak duhna thinlung a rawn keng tel a, 99% a tawk lo a, 100% a ngai a ni," tiin a player neih danah a lungawi thu a sawi.

Sporting Lisbon aṭanga United zawmtu Bruno Fernandes hi midfielder goal khung thei a ni a, Portuguese club tan pawh league match 83-a goal 39 khung thei a ni. United tan pawh Fernandes hian goal khung chhunzawmin league match vawi riatah goal nga a khung tawh a, striker tam tak tih theih loh a ni a, Europa League-a goal khat a khung nen English club tan goal ruk a der tawh.