Sane-a'n Man City aṭangin Bayern zawm dawn

Manchester City chuan Leroy Sane chungchangah Bayern Munich nen inremna an nei ta a, Bavarians hian Germany international la lut turin pound maktaduai 54.8 thleng an sen a ṭul thei ang. German champion hian Sane manah hian pound maktaduai 44.7 an pe phawt ang a, chet ṭhat dan a zira pek belh tur theih tur hi pound maktaduai 10 chuang a ni bawk. 

Kum 24 mi Sane hian kum 2016 khan Schalke aṭangin Man City hi a zawm a, Premier League-ah vawi hnih a champion pui. Season liam ta khan Man City-in tualchhung inelna pathum league, FA Cup leh League Cup-ah a champion vek a, Sane hi player pawimawh a ni.

Tun season-ah erawh Sane hi Community Shield-a inhliam vangin Premier League-ah minute 11 chiah a la inlan a, June 22-a Burnley an hneh ṭum khan bench aṭangin a lut. Pep Guardiola hian la chhawr zui thei mah se Bayern zawm tur player hi a hman chhunzawm a tum tawh lo.

Kar liam ta khan Spanish manager Guardiola chuan 2020-21 season-ah Sane-a contract tawp tur thu a sawi a, contract thar an zawrh a pawm theih loh thu leh chhuah a duh thu a sawi. Bayern hian Sane hlawh atan hian kum khatah pound maktaduai 20 vel an pe phal a, City erawhin hetiang zat zat pek an phal lo thung.

English club hian Sane hralhna man bakah hian 10% sell-on clause dah tel an tum a, hei hi an ti thei a nih chuan Bayern Munich-in an hralh chhuak a nih chuan an hralhna man aṭangin 10% an la 

thei ang.

Sane hian transfer tifel turin Germany a pan ang a, Manchester lamah a let rih tawh lo ang. Chumi awmzia chu Schalke winger hlui hian Man City tana a match hnuhnung ber a khel tawhah a ngaih theih a. Season thar inṭan hma chuan Bayern Munich tan a la inlan thei lo bawk ang.

Covid-19 vanga season ṭan leh hnuah Sane hi Man City matchday squad-ah la awm vek mah se khelmualah vawi khat chiah a lut. Chutihrualin English club tana a cham chhungin match 135 khelin goal 39 a khung a; Premier League, FA Cup leh Community Shield vawi hnih ṭheuh a chawi a, FA Cup-ah vawi khat a champion bawk.