KISCE atana thlan zingah RG Stadium, Mualpui a tel

India ramin Olympic-a result ṭha zawk a neih theih nan Sports Ministry chuan Khelo India Scheme hnuaiah Khelo India State Centre of Excellence (KISCE) a din dawn a, thlan hmasak zingah Rajiv Gandhi Stadium, Mualpui a tel.

KISCE hi India rama state leh union territory-ah pakhat zel dah turin ruahmanna siam a ni a, thawhkhatnaah hian sorkar enkawl sports hmun nei sa state pariat thlan phawt a ni. State thlante chu Karnataka, Odisha, Kerala, Telengana bakah hmarchhak aṭangin Arunachal Pradesh, Manipur, Mizoram leh Nagaland te an ni.

Union Minister for Youth Affairs and Sports Kiren Rijiju chuan, "Khelo India State Centre of Excellence hi Olympic-a India-in result ṭha zawk an neih theih nana tih a ni a. India ram state leh union territory tinah hian khawvel huap ang pawha training-na ṭha neih theihna tur dah vek kan tum a, ram puma infiammiten an hlawkpui ngei ang," tiin a sawi a, tuna state pariat thlang tur hian uluk taka zir hmasak phawt a nih thu a sawi bawk.

Kiren Rijiju chuan sawi chhunzawmin, "KISCE hian kan infiammite theihna a phochhuah phah ngei ka ring a, ram chhunga inelnaa lawmman la pha hian khawvel huap inelnaa an lawmman a lak phah ka ring. A bik takin Olympic-a result ṭha neih hi kan hma thlir chu a ni," tiin India rama infiamnain hma a sawn phah a rin thu a sawi.

Mizoram sorkar chuan KISCE atan hian RG Stadium chauh ni loin Dengṭhuama Indoor Hall, MSSC Sports Hostel,  Hawla Indoor Stadium leh Aizawl Aquatic Centre te a tel tur thu an sawi a; infiamna lamah Mizote ṭhatna boxing, weightlifting leh judo te chu thlurbing hmasak a nih tur thu an sawi.