Midangte ṭanpuitu Marcus Rashford

Manchester United forward Marcus Rashford chuan khawtlang nuna thil thleng chungchanga footballer-ten thawm an nei ta fo chu ṭha a tih thu a sawi a, anmahni 'hun' ah chuan thil thleng pangngai ve reng a nih chhoh tak thu a sawi bawk. 

UK sorkar chuan Thawhlehni khan sikul naupangten a thlawna ei tur an dawn ṭhin chu school term tawp tawh mah se an chhunzawm tur thu an sawi a, hei hi Manchester United forward Rashford hmalakna vang a ni. 

England international hian Covid-19 vanga harsatna karah nipui chawlh lai pawha sikul naupangten a thlawna an chaw dawn an dawn chhunzawm theih nan MP ho hnenah lehkha a thawn a, a lehkha thawn hi UK sorkar chuan awm tihpuiin a thlawna chaw sem hi an kalpui zui dawn a ni. 

Rashford-a hmalakna avang hian UK-a naupang maktaduai 1.3 vel chuan a thlawnin chaw an dawn chhunzawm dawn tihna a ni a, chhungkaw tam tak tan chuan thawk huaina tham a ni dawn. 

Kum 22 mi Rashford chuan, "Dik nia kan hriata kan au chhuak ngam te hian a êng lam zawngin min hruai ta a, tuna kan kal zel dan hi en ula kan hma hun a tan a lawmawm em em a ni," a ti. 

Rashford hian UK prime minister Boris Johnson nen pawh an inbiak thu a sawi a, "Thil lawmawm leh phurawm tak a ni," tiin a sawi. 

UK-a a thlawna chaw dawng thei chin hi bithliah a ni a, kum khata an chhungkaw sum lakluh chu chhiah pek vek hnuah £7,400 (Nuai 7.07) aia sang a ni tur a ni lo tih a ni. 

Rashford hian UK sorkar a dawr bakah hian lockdown chhung khan FareShare UK nena thawkdunin midangte ṭanpui nan pound maktaduai 20 zet a thawkchhuak hman a ni.