Juventus leh Lazio an inum zel

Paulo Dybala, Cristiano Ronaldo leh Douglas Costa te goal mawi hmangin Juventus chuan Genoa 3-1 in an luhchhuah a, pahnihna Lazio pawh Torino mualah 2-1 in an chak ve bawk. Serie A champion tum Italian club lian pahnih inkarah point li a awm chhunzawm.

Juve hian a zawna a vawi kua nan champion an tum a, engkim mai chu an kuta innghat a ni leh tawh - Inrinni zan hian Torino an hmachhawn leh ang. Lazio tan Old Lady chetsual chan a ngai, an match lehpekah AC Milan an hmachhawn thung ang.

Genoa mualah goal kan hmu mai lo, tlak hlau leh champion tum inkhel ni mah se hun chanve hma lamin goal a lut lo. Second half-ah erawh Dybala-a'n box chhungah ball vir puiin defender a paltlang hnuah 'solo goal' mawi a khung.

Barcelona nena inrem fel tawh Miralem Pjanic hnen aṭanga a ball hmuh chu Ronaldo-a'n mual chanve bul aṭangin chak takin a tlanpui a, Portuguese forward hian hla deuh tak aṭanga pet thutin tun hma lama a tih fo tawh angin goal ropui a khung zui.

Ronaldo hian season kal laiah goal 25 a khung tling leh der tawh. Turin club-in an la duhtawk mai lo, winger Costa-a'n box pawn aṭangin kum mawi takin an goal thumna a khung; Genoa tana Andrea Pinamonti goal khungin awmzia a nei phak tawh lo.

Juventus coach Maurizio Sarri chuan, "Player zawng zawng an khel ṭha vek. Rang tak takin ball kan inpe kual a, goal kan chhuah hmain goal pathum mawi tak tak kan khung. Italian Cup lama kan chet fuh lo hnuah ngai kan awh leh tawh," a ti.

Pjanic chungchang sawi zuiin Italian manager chuan, "A khel ṭha, player puitling tak a nih avangin transfer boruak vangin a buai miah lo tih a lang bawk. Kan tan a match hnuhnung ber thlengin ṭha takin a khel zui ang tih ka ring," tiin a sawi. Juve midfielder Pjanic hian inkhel bul a ṭan a, inkhel khaikhawmtu leh chei mawitu pawimawh a ni; minute 74-naah Aaron Ramsey chuan a rawn thlak. Arsenal midfielder hlui hian kuminah Juve tan khelhna hmun nghet a chang meuh lo.

Mualneitu Torino lamin minute ngana lekah Andrea Belotti-a penalty hmangin hma an hruaina chu an venghim zo lo. Second half-ah mikhual Lazio lamin Ciro Immobile leh Marco Parolo te hmanga chhang letin point thum an sual chhuak.

Simone Inzaghi naute hi Covid-19 hnua an match hmasa berah Atalanta lakah an chesual a, a hnu lamah erawh Fiorentina leh Torino an ngam leh ta. An match lehpeka an hmachhawn tur Milan lakah chuan tlarhnung lam an ven uluk zual a ngai ang.Kum 44 mi Inzaghi chuan, "Serie A match 29 aṭanga Ciro Immobile khung zat chu goal 29 a ni! 1958 khan Antonio Valentin Angelillo chuan hetiang zat match khelh tlin hian goal 31 a khung, ani hnuah chuan Ciro hi khung hnem leh ber a ni," tiin a forward a chhuan thu a sawi.

June 30, Thawhlehni zan

Torino    1 - 2    Lazio

TOR : Andrea Belotti 5' (P)

LAZ : Ciro Immobile 48'; Marco Parolo 72'

Genoa    1 - 3    Juventus

GEN : Andrea Pinamonti 76'

JUV : Paulo Dybala 50'; Cristiano Ronaldo 56'; 

   Douglas Costa 73'