Zaninah ISL club Jamshedpur leh Chawnpui

LG Independence Cup-a Mizoram pawn team awm chhun ISL club Jamshedpur chuan zanin dar 7:00 hian Lammualah Chawnpui an hmachhawn dawn.

Jamshedpur hian Pathianni khan an rawn thleng a, Aizawlah ni hnih training an nei tawh. ISL club hian an reserve team an rawn tir a, player tam zawk hi Tata Football Academy chhuak an ni a, MPL kai thar lakah fiahin an awm ang.

JFC chu

Jamshedpur FC manager Rohit Kr Singh chuan, "Inkhel tur chauhin kan rawn kal lo a, Mizoram aṭang hian thil tam tak kan zir theih kan beisei. Player langsar bik kan nei lo a, team anga kan khelh a ṭul a, team angin hlawhtlinna pawh chan kan tum," tiin Vanglaini a hrilh.

JFC hi reserve team an ni a, season thara I League 2nd Division khel tur an ni a, anni tan Independence Day Cup hi inpuahchahna ṭha takah a ngaih theih.

Rohit chuan, "Training ṭha tak kan nei thei a, boruak a nuam a, nuam kan ti hle. Chawnpui nen pawh inkhel hmuhnawm tak kan phochhuah theih kan beisei," tiin inkhel tura an inpeih tawh thu a sawi.

Chawnpui tan hun ṭha

Chawnpui FC-in match hmasa berah Mizoram Police an hneh lo a, an defender pawimawh captain Lalhlimpuia'n red card a hmuh avangin Jamshedpur a hmachhawn thei dawn lo.

Chawnpui assistant coach Rindika Hmar chuan, "Eng ang player-te nge lo kal kan hre lo a, chak kan mamawh a, chak tumin kan khel dawn. Kan game khelh dan pawh kan thlak dawn. Kan central defender rinrawl Hlimpuia kan chhawr thei lo tur erawh pawi kan ti. Chu ti chung chuan attacking game kan khel ang," tiin point thum hlawhchhuah ngei an tum thu Vanglaini a hrilh.

MPL kai thar hian MFA Super Cup-ah Aizawl FC Academy chu penalty shootout-ah an hneh lo a, I Day Football-ah Police an hneh loh bawk avangin MPL club an nih hnuah chak an la nei lo.

Rindika chuan, "Tawnhriat nei tlem kan nihna hi chhuanlama kan hman reng chuan, hmasawn lo kan ni dawn a, chu chu kan player-te pawhin siam ṭhat an tum ka ring," tiin chhuanlam siam loa chak an tum thu a sawi.

Jamshedpur FC
Vijay Kumar
Karandeep
Prakash Naik
Harsha Parui
Rakesh Yadav
Subham Ghosh
Srinjoy Dutta
Swarup Das
Md.Firoz Khan
Samim Hussain
Srivash
Yendrembam Naresh Singh
Amrit Gope
Gorachand Mardi
Raisen Hansdah
Baset Hansdah
Ravi Bhumij
Billu Teli
Praveen
Coaching Staff
Manager: Rohit Kr Singh
Head Caoch: Hilal Rasool Parray
Physiotherapist: Arghya Basu
Goalkeeper Coach: Mihir Sawant