Fury-a'n Wilder a cho

British boxer rothap Tyson Fury chuan Deontay Wilder nen inhmachhawn tura inbiakna an neih fel ṭep tawh thu a sawi a, "Wilder lo inring rawh le," tiin WBC heavyweight champion lai hi a cho hle.

Fury hian thla 32 zet boxing ring chhunga hun a hman loh hnuin thla hmasa khan Sefer Seferi chu awlsam takin a hneh a, August 18 khian Francesco Pianeta nen an inhnek leh ang.

Kum 29 mi Fury chuan, "Pianeta hi ka tukdawl zet ang a, a hnuah Wilder hi ka tukdawl leh ang, i lam ang hmiang!" tiin American boxer hi a cho hle.

Fury chuan sawi zawmin, "Mahni thusawia ding ṭhin mi ka ni a, Wilder ka hmachhawn dawn che ka tih chuan ka hmachhawn dawn che tihna a ni mai. Inbiakna pawh chak takin a kal mek a, engkim peih fel a ni ṭep tawh," a ti.

Kum 2015 khan Fury hian boxing khawvel barakhaihin Wladimir Klitschko a hneh a, WBA, IBF leh WBO kawnghren a la. Mahse, kum 2016 khan rilru lam buaina leh damdawi hman phal loh hman a neih avangin hrem a ni.

Fury promoter Frank Warren chuan, "Wilder nena an inhnekna tur hian thui takin inbiakna kalpui a ni tawh. Wilder hmachhawn hi a tan a hma mah mah ang em? Pianeta nen an inhnek hunah a chhanna chu pek kan ni ang. Gym-a Tyson che tla lai en chuan hma a sawn zel a ni," tiin a boxer chu a ring tawk hle.

Frank chuan sawi zawmin, "Tyson hian Wilder hmachhawn turin a inpeih tawhah a innngai a nih loh chuan hma ka lak sak hauh lo ang. August-a a inhnek hun nghak ila, kum tawp hmain Wilder hi a hmachhawn hman ngei beisei ang," tiin a sawi.