Hnehna nen Murray a lo kir

Andy Murray chu hun rei tak chhung tennis a khelh theih loh hnua a inkhel ve leh thei ta a, Thawhṭan zan khan Washington Open first round khelin Mackenzie McDonald a hneh.

Wimbledon vawi hnih champion tawh Murray hian awlsam takin hnehna a chang mai bik lo, match point vawi sarih a hmuhna a chhawr ṭangkai thei chauh a, darkar khat leh minute 13 chhungin 3-6, 6-4, 7-5 in hnehna a chang.

World number 1 hlui Murray hian a inkhelh theih loh chhunga Britain number 1 nihna chhuhsaktu Kyle Edmund chu zanin hian a hmachhawn zui leh dawn a ni.

Kum 31 mi Murray hian a hliam vangin Wimbledon kha a khel thei lo a, June 18 khan Queen's Club Championship-ah inlan ve mah se Nick Kyrgios a hneh lo; Australian tlangval laka a chak loh hnuah tun ṭum hi a inkhelh lehna hmasa ber a ni.