Lopetegui-a'n Bale a beisei sang

Real Madrid coach Julen Lopetegui chuan Juventus lama kal ta Cristiano Ronaldo hmun ruak chu Gareth Bale-a'n a luah theih tur thu a sawi a, Zinedine Zidane hnuaia hmun pawimawh chang pha lo forward hi rinrawlah neih a tum dawn niin a lang.

Wales forward Bale hi Zidane-a enkawlna hnuaiah khan a hlim lo a, Real chhuahsan tur angin sawi a ni. Mahse, Zidane zawk a chhuah tak avangin Tottenham Hotspur forward hlui hi Santiago Bernabeu-ah a cham chhunzawm zel dawn niin a lang ta.

Lopetegui chuan, "Gareth hi Real Madrid-a khelh chhunzawm zel turin a hlim tawk a ni. Cristiano Ronaldo kha he club chanchina player pawimawh tak a ni a, mahse chhuah a dil avangin kan phal sak. Gareth Bale hi player theihna nei sang tak a ni a, Ronaldo hmun ruak hi a luah khat thei ang," tiin Bale lakah beiseina a nei sang hle.

Kum 29 mi forward hian kum 2013 khan Real Madrid hi a hunlaia footballer manto ber ni turin pound maktaduai 87-in a zawm a, Spanish club tana a khelh hnu hian Champions League nomawi ringawt pawh vawi li a chawi tawh.

Lopetegui chuan Bale chu France forward Karim Benzema nen training ground-ah an inthlawp ṭhat thu sawiin, "Season ṭan dawnah he squad hi ka nei dawn a nih chuan pa hlim tak ka ni ang," a ti.

Gareth Bale hi Premier League club, a bik takin Manchester United nen hun rei tak sawi zawm an lo ni tawh a, Real boss thusawi aṭanga teh tur a nih chuan Welsh forward hi a chhuak dawn lo niin a lang.

Spain boss hlui Lopetegui chuan, "Gareth hi Real-ah a hlim a, a tan chuan tun hi a theihna tak tak pholanna remchang tak a ni. He hmunah hian a hlim a, kan hmachhawp pawh a hrechiang em em. Ka tan chuan zinkawng inṭanna phurawm tak a ni," tiin a sawi.