Police chelh tum Kanan

LG Independence Cup-ah Kanan FC-in an match hmasa berah champion lai Chhinga Veng an hneh lo a, vawiin tlai dar 2:00-ah Mizoram Police an hmachhawn dawn.

Semifinal beiseina nei turin Aizawl DFA club Kanan hian vawiin tlaiah point hlawh chhuah ngei an mamawh.

Kanan an tlo?

Kanan-in MFA Super Cup-ah Chhinga Veng chu hun pangngaiah an draw theih avangin I Day Football an khelh theih phah a, an match hmasa berah Chhingcows bawk an hneh lo.

Amaherawhchu, Kanan hi first division club ni chung siin an ṭang thei a, Chhinga Vengin goal hnih khung mah se goal chance ṭha an insiam tam lo.

Royal Wahingdoh player hlui H. Malsawmtluanga leh tualchhunga hming langsar ṭhin Tezawka ten Kanan hi an ho a, Police laka point an hlawhchhuah chuan lawmawmah a ngaih theih ang.

Police nge nge

Mizoram Police-in tawnhriat nei player an kawl avangin hun harsaah an ding chang ṭhin a, an match hmasa berah Chawnpui 2-1 in an lehthal. Hemi ṭum hian Lalbiakhlua leh Lalfakzuala ten goal an khung a, player ṭhate hun pawimawhah an lang leh ṭhin.

Police-in tlarhmaah Biaktea leh Fakzuala bakah F. Lalrinpuia leh Lalsangbera te an kawl a, an tlarhnung erawh pan deuhin lang mah se Kanan sut tlang tur atan chuan a la khawng ṭha hle.

Vawiin tlai inkhelah Lalbiaksanga Colney hote chak tura rin an ni a, Kanan hi an hna ti awlsam tur ni n loin a kaw tawpa ṭang tur an nih avangin point hloh theihna a ni ang.