Virat Kohli : Cricket Ronaldo?

Cristiano Ronaldo chung­changa an sawi fo ṭhin chu a thawhrimna leh thiamna hi a ni a, player dang zawng aia a thawhrim chungchuan bik ṭhin avangin fak a hlawh hle.

Cricket khawvelah chuan Virat Kohli hi a thiamna piah­lamah a thawhrim chungchuan bik avanga hriat hlawh a ni a, 'Cricket Ronaldo' tih hialin hming lem an pe ṭhin.

Player pahnih hi an thiamna leh thawhrimna mai a ni lo, an hmel leh pian avangin hralh an 'tla' a, sumdawnna khawvelah pawh infiammi zinga dawr hlawh ber pawl an ni.

Chak duhna thinlung tak tak an pu a, khelmual chhunga rilru zawng zawng pe mi an ni. Team innghahna an ni a, khelmuala ṭhiante fuih phur ṭhintu, rilru huai­sen leh hruaitu nih tlin tak an ni.

Thawhrimna

World Cup Under 19-ah khan captain nichungin Kohli-a'n India a champion pui a, kum 20 pawh a tlin hma khan century vaw chhuakin a hming a lo chher daih tawh - talent a neih ṭhat zia hai theih a ni lo.

Mahse, Kohli hi test cricket bikah chuan player ṭha tak anga chhiar a ni ngai lo a, a test match hmasa 20-ah beisei a phak lo - one day player ṭha tak ni turin beisei a ni a, a bakah erawh beisei a ni lo.

Kum 2012 Indian Premier League-ah khan Kohli hian beisei a phak lo a, chu tak chu a inhmuhchhuah ṭanna a ni. Kohli chuan, "Ka duh duh ka ei a, zan rei tak tak ka meng a, training ka nei nep hle bawk.

"Mahse, ni khat chu dar­thlalangah ka in en a, 'Professional cricketer nih i duh chuan hetiang taksa neih hi a thiang lo' tiin keimah leh keimah hi ka inhrilh a ni. Ka thil chin ṭha lo zawng zawng ka bansan nghal a, nitin gym-ah darkar khat leh a chanve hun ka hmang a, cold drinks takngial pawh ka in duh tawh lo. A harsa em em a ni," tiin tun dinhmun thleng tura a thawhrim thu a sawi.

Tichuan...

Kohli a piangthar a, cricket khaw­vel a thunun chhunzawm. India tan chakna hnar a ni a, bowler te tan mangchhia thlentu a ni a, cricket khawvelah chuan Kohli hming lo chu a leng meuh lo.

Kum 2014 khan MS Dhoni thlakin India captain-ah ruat a ni a, hetih hunlai hian India dinhmun a chhe hle. Test ranking-ah pasarihna an ni a, an hnuai chiaha awm chu Bangladesh an ni. Batsman ranking-ah 15-na a ni bawk.

Kohli-a'n a chunga mawh­phurhna sang tak hlen ngei a duh a, a training kalphung a thlak nghal. A ke tha ti chak turin 'squat' lam a bei nasa a, tharum ngah turin ritchawi lam a bei a, a tih ang taka training bei ve turin India tana a khelhpui te chu a hrilh bawk.

Tun hnai kum hnih chhungin one day international-ah match tina run 91 zel siam ang a ni a, vawi 10 ngawt 100 vaw chhuakin a chet ṭhat tam zawkah hian a team a chakpui.

Thawhrimna rah

Kohli-a'n test captain din­hmun a luah hnuah match tina run 65 zel siam ang a ni a, hundred vawi 14 vaw chhuakin India chu vawi khat chiah a la tlawmpui bawk - test a khelh tawh hrim hrima a run siam zat hi 5,554 a tling.

India captain hian a ke tha ti chak tura 'squat' lam a uar hnuah nasa takin hma a sawn a, lei hrula ball kal thlenga 'hmachhawn' turin a ke lamin thahrui an ngah phah a, hma a sawn phah hle.

Football-ah chuan Lionel Messi-a'n pianpui thiamna a nei a, thawhrimna hmangin Ronaldo a parvul tiin an sawi ṭhin. Cricket-ah chuan Sachin Tendulkar kha pianpui thiamna nei nia an sawi ṭhin a ni a, Kohli erawhin a thawhrimna hmangin a thiamna a sual chhuak thung.

India cricket team hi England nena test series khel turin an thang mek a, vawiin tlai dar 3:30 hian test match nga an khelh tura an match hmasa ber chu England nen hian an khel ang - ram pahnih hi ODI series-ah an intawng tawh a, 2-1 in mualneitu England an chak.