Saina leh Srikanth an tlang
Saina Nehwal leh Kidambi Srikanth te chuan Badminton World Championship-a an match hmasa berah hnehna an chang a, Indian shuttler pahnih hian Thawhlehni khan harsa lutuk loin third round an inhlangkai.
Nanjing, China-a inkhelah Saina hian Aliye Demirbag chu 21-17, 21-8 a hnehin World Championship-ah hian a vawi riat nan third round a lut a, tunlai hmeichhe singles player zingah ani aia second round paltlang hnem an awm lo. India nula hian last 16-ah chuan seeded palina Ratchanok Intanon a hmachhawn dawn a, a hna a hautak tawh hle ang.
Mipa singles lamah Srikanth chuan 21-15, 21-16 in Nhat Nguyen a hneh bawk. World number 6 Srikanth hian vawiinah Pablo Abian a hmachhawn leh nghal ang. Seeded pahnihna Lee Chong Wei a inhnuhdawh avangin Srikanth tan semifinal kalkawngah a hna a harsa lutuk dawn lo niin a lang.
Kum 28 mi Saina hian nikum khan Glasgow-ah bronze medal a vaw chhuak a, mipa singles player ṭha Srikanth erawh Son Wan Ho hneh loin quarterfinal-ah a tla. Kuminah anni pahnih hi India tana medal beiseina langsar an ni.
Mixed doubles pair Satwiksairaj Rankireddy leh Ashwini Ponnappa te chuan seeded 15-na Mark Lamsfuss leh Isabel Herttrich te ṭangdun chu 10-21, 21-17, 21-18 a hnehin second round an paltlang bawk, anni pahnih hian seeded pasarihna Goh Soon Huat leh Shevon Jemie Lee te an tawng leh ang.
Indian shuttler dang HS Prannoy leh Sameer Verma te pawhin Thawhṭani khan an match hmasa ber khelin hnehna an lo chang tawh a, vawiin hian nikum lama silver medal la tawh PV Sindhu chuan a match hmasa ber a khel bawk dawn a ni.