Riyad Mahrez a hliam na lo

Manchester City player manto ber Riyad Mahrez ke rek hliam chu a ruh a tliak lo a, tunkar chhunga team training a zawm leh nghal theih dawn avangin Pathianni zana Chelsea nen Community Shield an khelh hunah a inlan theih beisei a ni.

July 29 zan khan Premier League champion hian German champion Bayern Munich lakah si hnih an phurh hnuin 3-2 in an lehthal thei a, he inkhelah hian a tir lamah Chris Richards nena ball an inchuhnaah Mahrez hian hliam tuarin lak chhuah a ngai nghal, a tirah City manager Pep Guardiola chuan hliam na tak a nih a hlauh thu a sawi hial.

Amaherawhchu, pound maktaduai 60 man Mahrez hliam hi endik a ni a, a ruh a tliah loh bakah tha chat a awm lo. Tun kar tir lamah chuan indim vangin training pumhlum a nei thei dawn lo a, kar tawpah erawh a ṭhiante kiangah a pangngaiin a chet theih a rinawm.

Thuchhuah siamin Man City chuan, "Riyad hliam endik a ni a, thil dik lo leh duhawm lo a awm lo hlauh. FA Cup champion Chelsea nen Community Shield kan khelh hunah manager-in a duh a nih chuan a khel thei ang," an ti. Guardiola kutah a awm tihna a ni.

City an inpeih lo?

World Cup 2018-ah khan Manches­ter City chuan player 16 ngawt an thawh a, Premier League champion team player Russia-a kal te hi an tlak

aṭanga chawlh kar thum thleng zel chawlh pek an ni a, an zinga pakhat chiahin club training a la zawm thei a ni.

Man City tan season hmasa lama an player pawimawh Kevin De Bruyne, Vincent Kompany, John Stones, Kyle Walker , Fabian Delph leh Raheem Sterling te chuan tun kar tawp hian training an zawm tawh tura beisei a ni.

Player ṭha tam zawkin club an la zawm miau loh avangin Spanish manger tan inbuatsaih dan thiam a harsa ang, pre season an hman chhohnaah pawh player naupang zawk an chawr nasa hle - Bayern Munich lakah pawh kum 20 hnuai lam panga ngawt an inlan.

Man City manager Guardiola chuan, "A ṭhen chu an rawn let ṭep a, player ṭhenkhat erawh nghah deuh an la ngai ang. Community Shield atan inbuatsaihna hun kan nei tam tawh lo a, match pawimawh khelh hma hian kan insiamrem hman ngei ka beisei.

"Player ṭha chu kan mamawh ngei mai, mahse an rawn let hunin a zir miau loh chuan inkhel tura inpeihte kha khelmual chhungah an lut ang. Thil awlsam tak a ni dawn lo a, hun rei lote chhungin tam tak zir kan ngai dawn a ni," tiin a sawi.

Man City hi Chelsea nen Commu­nity Schield an inchuh hnuah EPL atan kar khat chiah inbuatsaihna hun a nei dawn a, August 12 zan hian an league match hmasa ber atan Arsenal khelmual Emirates Stadium-ah an lenglut dawn a ni.

Player thar

Arab sum hmaga siam len an nih hnuah Man City hian player lei nan sum an hmang huai a, club dang nena khaikhina hlawh an pek hnem ngam avangin an duh zawng an la thei hle.

Barcelona manager hlui Pep-a'n season hmasa khan a tlarhnung thuam chak nan player a la khawm hnem a, tun nipui bazarah erawh Mahrez chiah a la lei. Leicester City winger hlui hi goal khung lam thiam leh ti mi a ni thung.

Kum 47 mi Pep chuan, "Season hmasa khan sum kan hmang hnem a, tun bazar hun chhung atan chuan player dang pakhat emaw chu kan lak belh leh mai thei a, la lo pawh a ni zawk thei bawk. Tunah chuan kan neih saah hian ka lungawi a, in man leh lungrual taka kan khel a nih chuan team ṭha tak kan din leh ngei ang," tiin a sawi.