Chanmari-Electric Derby-ah chak zawk awm lo
Nimin khan Chanmari FC leh Electric Veng FC te a vawi khat nan top flight football-ah an inhmachhawn a, goal lut loin an inhnehtawk.
LG Independence Cup-ah Electric Vengin an match match hmasa berah Aizawl FC an hneh a, I League club an hneh avangin MPL kaithar hi semifinal lut turin an dinhmun ṭha.
Nizan khan group B inkhel dangah Ramhlun North leh Bethlehem Vengthlang FC te an inkhel a, result kan hre hman lo.
Duh thlang thei leh thei lo
Chanmari coach Lalruatliana Sailo-in starting eleven-ah Mizo winger ṭha pahnih Lalmuanzova leh Vanlalbiaa Chhangte te a dah lo a, squad a neih chhah miau avangin duhthlan tur a nei.
Tlarhmaah Shillong Lajong forward hlui Lalrammuana chu maltlat tirin MFA Super Cup top scorer Laldampuia leh Lajong youth system chhuak Jeremy Laldinpuia te chu mual sirah dah an ni.
Electric Veng pawhin chak tum thoin MPL atan player an inenchhin chhunzawm a, Chanmari left back hlui David Lalchhuanawma chu tlarhmaah mal tlattirin Zo United midfielder hlui Isak Vanlalpeka chu thlawp tirin Electric Veng tlangval ball thiam pahnih C. Laldinmawia leh Vanlalremdika te chu midfield laiah an inkawp.
Tlarhnung phui ṭha
First half-ah goal chance hmuh tur a awm meuh lo a, Electric Veng right back C. Lalnunmawia chuan Chanmari innghahna Dampuia a dang ṭha hle. Rengtekawn tlangval Mawitea hian goal nawr kawngah inzirna tur la ngah mah se goal venhim kawngah erawh a che ṭha a, Dampuia leh a thlaktu Lalmuanzova te dah ṭha tiin a sawi theih.
Electric Veng tan winger tlan chak Vanlalhmangaiha chuan vawi tam Chanmari tlarhnung a rum ṭhaih a, amaerawhchu a hmawr bawk tur an nei lo. Chutihrualin first half-a Khawhai tlangval Vanlalremsanga ball pet kawh tak, Chanmari keeper MS Dawngliana dan erawh a ṭha takzet. Team ṭha zawka ngaih Chanmari lamin goal chance insiam an harsat.
Second half-a Muanzova leh Mabiaa te luh hnuah pawh Chanmari an hlauhawm chuang lo a, hun tawp hma hretin Bawngkawn tlangval Lalnuntluanga ball pet chu Electric Veng keeper Lalrinnunga Hnamte-in a dang ṭha hle.
Injury time-ah vek Electric Vengin chak theihna hun ṭha an nei a, midfield khaipa Dinmawia'n corner aṭanga a ball hmuh chu goal zawnah a tauh thei lo. Electric Veng tlangval Dinmawia hi mual laiah a ṭangkai avangin goal luh lohna inkhelah hian man of the match-ah thlan a ni tho.
AFC aia ṭha Chanmari?
Electric Veng coach Vanlalsawma Colney chuan, "Chanmari hi Aizawl FC aia kan huphurh zawk an ni a, anni laka point kan hlawh chhuak thei hi kan lawm hle a ni," tiin first match-a an hneh I League club AFC aiin MFA Super Cup an dah sang zawk.
MPL kai thar hian Ramhlun North leh Bethlehem Vengthlang FC te an la hmachhawn dawn a, point li an hmuh tawh avangin semifinal khelh chu beisei ngam loh a ni tawh lo.
Chanmari FC coach Lalruatliana Sailo chuan Muanzova leh Mabiaa te bench-a a dah chhan chu mimal harsatna emaw tactic lam thil a nih theih thu a sawi a, result ṭha nei tur hmasawn an mamawh thu a sawi lang bawk.