Liverpool tan kum ṭha?

"Kan kum a ni ve tawh ang," tiin Liverpool fan ten an sawi chamchi a, nomawi chawi lo bawkin season an hmang liam leh ṭhin. Kuminah pawh "Kan kum a ni ve tawh ang," tiin an thlir leh mek.

Reds-in league nomawi an chawi hnuhnung ber chu 1990 kha a ni tawh a, Champions League-a an champion hnuhnung ber chu 2005 a ni a, kum 2006 hnuah FA Cup-ah an champion leh tawh lo bawk.

Kum 2012 khan Liverpool hian major tournament-a an champion hnuhnung ber an tawng a, League Cup-ah an champion. Hemi hnuah erawh nomawi chawi an nei leh tawh lo.

Mahse, October 2015-a Jurgen Klopp an neih hnuah Liverpool-in beiseina thar an nei ve leh ta a, German coach hnuaiah hian season hnih leh a chanve chhung lekin Champions League, Europa League leh League Cup final an khel leh vek tawh!

Liverpool leh bazar

Manchester United manager Jose Mourinho-a'n, "Heti zat pawisa an hmang a nih chuan champion an tum tur a ni," tiin Liverpool chungchang a sawi a, United manager hian an elpui team hi pressure pek a tumna ni mah se a thusawi hi tam takin an ṭawmpui ang.

Reds hian tun nipuiah ringawt pound maktaduai 170 dawn an seng tawh–Guinea midfielder Naby Keita chu RB Leipzig

aṭangin pound maktaduai 50-in an lalut tawh a, AS Monaco midfielder Fabinho chu pound maktaduai 40 vela leiin winger Xherdan Shaqiri chu pound maktaduai 13-in an lalut bawk.

Alisson chu khawvela goalkeeper manto ber ni turin pound maktaduai 66.8-in an lei a, January khan centre-back Virgil van Dijk chu khawvela defender manto ber ni turin pound maktaduai 75-in an lalut bawk.

Player an lakluh dan thlirin Liverpool fan-ten, "Kan tan kum ṭha a ni tawh ang," an ti a nih pawhin an demawm hran lo–player langsar rual enkawl turin Jurgen Klopp an nei tlat.

Player neih sa

Liverpool-in transfer bazar-a an player lakluh enin theihna nei sang tak an nih hlawm avangin an ṭhatpui dawn tih a chiang a, an player neihsa thlir phei chuan Reds tan kut ruaka season khar hi thil mawi lo a ni tawh zawk ang.

Mohamed Salah, Sadio Mane leh Roberto Firmino ringawt pawh hi ṭhatpui tham an nihzia season hmasaah kan hmu tawh a, Keita, Shaqiri leh Fabinho ten an belh phei chuan an ṭha sawt ang tih a chiang.

Liverpool buaina chu goalkeeper a ni tih Champions League final-in chiang takin a pholang tawh a, Alisson a awm tak avangin Liverpool fan-te rilru a nuam sawt ang.

Season hmasaa hliam vanga talbuai Daniel Sturridge-a'n pre-season tour-ah a in fit ṭhat phawt chuan tawh a khirh dawn tih a pholang a, Luis Suarez nena SAS tih hminglem an pek khawpa lo inkawp fuh tawh striker hi a dam ṭhat ni chuan eng team tlarhnung pawh hmachhawn turin a ṭha tawk.

A la tawk lo

Liverpool fan-ten an player neih sa leh a thar an thlir a, hlim takin lawm khuang an beng a ni mai thei–mahse Klopp ngaihdan erawh a dang thung a, Reds tan tun hi hlim hun a la ni lo!

German coach chuan, "Kan hmaa chona inchhawp tan kan inpeih tur a ni a, kan tum ram kan thlir ran tur a ni. Hlawhtlin chakin kan tuihal tur a ni a, match zawng zawngah hnehna chan duhin kan rilru kan seng tur a ni.

"Team dang zawng zawng pawhin player ṭha tak tak an nei a, chuvangin awm mai mai thei kan ni lo a, player lakluh leh thil dang vanga lawm hun a la ni lo.

"Pre season chauh a la ni a, kan fan-te hi tunah an hlim a nih chuan ka hrethiam. Mahse, hetianga hlim reng tur chuan kan hmaah hnathawh tur tam tak a inchhawp a ni," tiin a sawi.