Ozil thlawptu an pungkhawm

Mesut Ozil-a'n Germany tan a khelh duh tawh loh thu a sawi chuan boruak a siam zel. Germany Football Association lamin an dem a, chutihrualin Arsenal midfielder hian thlawptu ṭhahnem tak a nei.

Germany khawpui Berlin-ah Ozil thlawptu mipui an pungkhawm a, heng mite hian 'I am Ozil' tih chuanna T-shirt hain Ozil an thlawp zia an lantir; mipui pungkhawm hian Turkish leh German hnam puanzar an vai pawlh nasa hle.

Kum 29 mi Ozil hi Turkish president Recep Tayyip Erdogan nena thla an lakdun avangin nasa taka sawisel a ni tawh a, World Cup-a Germany an chetchhiat chhanah dem a hlawh hle bawk. Ozil hian a phu ang tawk zahna a dawn loh vang leh, a chet fuh loh ṭuma pem lut ang maia an chhuah ṭhin chu a ngaitheih loh vangin international football a chawlhsan a ni.