Messi hoin Barca an chak leh ta

La Liga an khelh chhunzawm zel a, thawnthu ngai bawk kan ngaithla nawn leh ta - Barcelona an chak a, Lionel Messi chuan goal a khung. 

Thawhlehni zan khan Barcelona hian 2-0 in Leganes an hneh a, Ansu Fati leh Messi (penalty) ten goal an khung. Table chung berah an awm chhunzawm a, champion an hnaih zel. 

Barcelona hian La Liga khelh chhunzawm leh a nih hnuah match hnih an khelhna chiah a ni a, an chak ve ve. Match hmasa berah Mallorca chu 4-0 in an sawp a, Leganes 2-0 in an hneh zui. 

Catalan club-in match hnih lek an khelhah goal ruk an khung a, an lamah a la lut lo - an elpui Real Madrid tan thu hriat nuam a ni lo a, champion turin Zinedine Zidane naute tan tha thlah a thiang lo. 

Kum 17 mi Ansu Fati chuan a kum tlem mah se top flight football khel turin a puitling tawk tawh tih a pholan chhunzawm zel a, minute 42-naah Leganes laka an goal hmahruai a khung. 

Guinea-Bissau-a piang winger duhawm hian tun season-ah Barca tan inelna hrang hrangah match 25 khelin goal ruk a khungsak tawh a, Fati chanchin hi kan la hre dawn chauh niin a lang. 

Fati hian August 25 khan Barcelona tana a match hmasa ber a khel a, Real Betis chu 5-2 in an hneh - hetihlai hian kum 16 leh ni 298 mi chauh a ni a, Barcelona first team tana inlan thei naupang pahnihna a ni. 

August 31, 2019 khan Osasuna lakah goal khungin 2-2 in an inhnehtawk a, a professional career-a a goal khung hmasak ber a ni. Osasuna laka goal a khung hian kum 16 leh ni 304 mi niin Barca tana goal khung thei naupang ber record a siam a, La Liga-a goal khung thei naupang pathumna a ni bawk. 

Spain Under 21 tana vawi hnih inlan tawh rawlthar hi a chanchin kan la hre dawn chauh a, khawi lam chhuak nge a nih? tih erawh hre lo kan la awm nual ang. 

Guinea-Bissau-ah piang mah se kum ruk mi lek a nih laiin Spain-ah hian an chhungkuain an pem a, September 20, 2019 khan Spanish khua leh tui nihna pek a ni. 

Seville-a seilian Fati hian an khawtual club Herrera leh Sevilla youth team tana a khelh hnuin kum 2012 khan Barcelona academy hmingthang La Masia a zawm a, hetihlai hian kum 10 mi a ni. 

Fati-a unau Braima leh Miguel te pawh footballer tho an ni a, a pa Bori Fati pawh inkhel ṭhin tho a ni - Guinea Bissau aṭang hian Portugal-ah an pem phawt a, a pa Bori hian nun ṭha zawk beiseiin Spain-ah a pem pui a, a tisual lo hle. 

Barcelona an chak chuan Messi-a'n goal a khung tlangpui - Thawhlehni zanah pawh Argentine forward hian goal a khung a, minute 69-naah penalty hmangin an goal hnihna a chhuih lut. 

Leganes defensive midfielder  Ruben Perez chuan Messi dan theih dan ṭha ber nia a hriat hmangin a lo ti tlu a, penalty a chawi. Messi chuan a hun ṭha bawh pelh loin goal-ah a chantir a, 2-0 in an chak. 

Messi-a'n ram leh club tana goal 699 a khungna chiah a ni a, a career-a goal 700 khung tling turin goal khat chiah a mamawh ta! Argentine forward hian Barca tan inelna hrang hrangah match 720 khelin goal 629-a khung tling tawh a, Argentina tan match 138 khelin goal 70 a khung bawk. 

Barcelona tan tun season La Liga bikah match 24 khelin goal 21 a khung a, inelna hrang hrangah match 33 khelin goal 26 a khung tawh bawk - a la khung dawn chauh!