Italian football kalhmang a danglam tawh - Gattuso

Gennaro Gattuso chuan player a nih ve lai leh tunlai Italian football khelh dan chu a danglam hle tawh niin a sawi a, tunlai khawvel mila inher rem ve zel a pawimawh thu a sawi bawk.

Italian midfielder rorum ni ṭhin hian inkhelh a chawlhsan hnuah a club hlui AC Milan a enkawl a, a hlawhtling tawk lo. Nikum December thla aṭang khan Napoli a enkawl ṭan, a team tharah hian danglamna nasa tak a thlen. Milan a enkawl lai khan Coppa Italian final lut mah se Juventus an ngam lo. Kuminah erawh Old Lady hi hneh chungin Napoli chu nomawi a chawi pui a, cup la tura an kalkawngah hian goal khat chauh an chhuah.

Kum 43 mi Gattuso chuan, "Player ka nih laia ka hun hnuhnung lamah khan Spanish team ka hmachhawn a, khelmual chhungah khan inhnaih tak tak khan rang zet zetin ball an inpe kual a, holam takin kan lamah an khung leh mai ṭhin. "Ball an chan hnem bakah an che rang em em bawk, inkhel thunun dan ṭha tak a ni tih pawh ka hre thei. Team enkawl hna ka thawh hnuah Italian football kha ka hlawhtlin pui theih ka inbeisei a, mahse chutiang ngawt chu a lo ni si lo. Serie A team ṭhenkhat chuan Spanish team khelh danin an lo khel daih tawh kha a lo ni," a ti.

Serie A a hmuh dan sawi zawmin Gattuso chuan, "Tunah chuan Italian football ka thlir dan pawh a danglam hret hret. Tlarhnung rem phui pawimawh zia chu ka la hre reng a, chutih rualin goal nawr tura ball inpek kual ṭangkaina pawh ka hre thar zel, kan insiamrem zel ang," a ti. Napoli hian Serie A match an khelh hnuhnung pangaah hnehna an chang vek a, season tir lama an chet chhiatna chu an hliahkhuh chho zel. Table-ah parukna niin season thar atan European football an beisei mek zanin dar 11:00 hian palina ni lai Atalanta an lenchilh ang.