Asensio lakah Zidane hmahmawh a tum lo

Season ṭan dawna a inhliam avanga tun season-a kan la hmuh loh Real Madrid midfielder Marco Asensio chu dam chiang tawh mah se coach Zinedine Zidane chuan a player hmang tur hian a la hmanhmawh loh thu a sawi.

Real Madrid hian Pathianni Zan khan Covid-19 hnua a vawi khat nan La Liga match an khel a, an mikhual Eibar chu harsatna nei loin 3-1 in an hneh - he inkhelah hian Asensio chu bench-ah dah a ni a, khelmualah a lut lo thung. 

Zidane chuan, "Kan bula Marco a awm leh ta hi kan lawm takzet a, mahse kan hmanhmawh lo ang. Player ṭha tak tak kan kawl ṭeuh a, Asensio pawh a dinhmun a ṭha tawh hle. 

"Khelmualah ka la luhtir ngei dawn a, midang ang thoa inpeih reng hi a mamawh chu a ni mai," tiin a sawi - Real hian zanin dar 1:30-ah Champions League khelh beisei Valencia an mikhual dawn a, Asensio inlan dawn leh dawn loh hi hriat a châkawm tawh hle. 

Nimin lama Real Madrid training lai video darhah chuan Asensio hi a tal na hle a, goal mawi bik a khung lai pawh hmuh turin a awm. Zidane-a'n a hman duh phawt chuan a hman tlak tawh.