Roma-ah Mkhitaryan cham chhunzawm dawn

Henrikh Mkhitaryan chuan AS Roma tan season khat dang a khel chhunzawm dawn. Player loan hun chungchangah hian a neitu Arsenal leh a hawhtu AS Roma te chuan inremna an siam fel tawh.

Armenian midfielder hian nikum September thla khan Premier League club aṭangin Roma hi loan hmangin a zawm a, a tirah chuan season khat atan tih ni mah se an inbiak remna angin season khat dang a cham leh ang.

Kum 31 mi Mkhitaryan hian Gunners tan 2020-21 season thleng daih contract a nei a, North London club tan match 59 a khelh aṭangin goal kua a khungsak hman - loan hun an pawhsei takah chuan a club pangngaiah hian a kir leh dawn tawh lo tihna a ni.

Emirates Stadium lamah hmun chang mumal lo mah se Roma lamah erawh a ṭangkai, Italian club tan hian match 19 khelhsak tawhin goal nawr kawnga an thahrui pawimawh a tling phak.