Leeds-in point hnih an hloh

Premier League hnuai chiaha inelna Championship-ah champion tur hriatthiam a la har hle. Hmahruai mektu Leed United-in Thawhlehni zan khan table mawngphaha awm Luton Town nen 1-1 in an inhnehtawk. Marcelo Bielsa hote hi pakhatnaah awm chhunzawm mah se pahnihnaa awm West Brom-in nizana Sheffield Wednesday an hneh a nih chuan point khat chauhin hma an hruai dawn.

Elland Road-a inkhelah hian Leeds United hian Patrick Bamford hmangin goal chance an nei hmasa a, amaherawhchu an hun ṭha neih an hmang ṭangkai lo. Minute 50-naah Harry Cornick-a'n mawi zetin Luton Town hmahruaina goal a hlai lut a, Leeds United point thum hloh thei dinhmunah an ding.

Bielsa hoten minute 63-naah Stuart Dallas hmangin siphurh an sut a, chak turin hun leh goal chance ṭha nei mah se an vanneih ṭum a ni lo. Leeds United-in an mualah goal khat bakah an khung theih loh avangin relegate thei dinhmun lakah point hnih an hloh.

Championship aṭang hian a sang pahnihin season tharah Premier League an khel dawn a, pathumna aṭanga paruknain playoff hmangin hmunruak pakhat an inchuh ang. Season liam ta khan Premier League mawi ṭhintu Leeds United hi season tawp lamah an chesual a, pathumna an nih tak avangin playoff-ah Derby County lakah an vanduai nghal.

Tun season-ah Leeds United hi dinhmun ṭha takah ding nawn mah se pathumnaa awm Brentford-in Reading 3-0 in an hneh a, Bielsa hote an phak lohna hi point ruk chiah a ni tawh. Palinaa awm Fulham pawhin Queens Park Rangers 2-1 an hneh avangin Leeds nen an inkarah point sarih chiah a awm.

June 30, Thawhlehni Zan

Millwall    1 - 1    Swansea City

Barnsley    2 - 0    Blackburn Rovers

Cardiff City    0 - 0    Charlton Athletic

Reading    0 - 3    Brentford

Queens Park Rangers    1 - 2    Fulham

Leeds United    1 - 1    Luton Town

Wigan Athletic    3 - 0    Stoke City