NFL commissioner-in Kaepernick a thlawp

American football-a inelna sang ber NFL commissioner Roger Goodell chuan NFL club zingah San Francisco 49ers quarterback hlui Colin Kaepernick lalut duh an awm a nih chuan a thlawp thu a sawi!

Kum 32 mi Colin Kaepernick hi kum 2016 khan US hnam hla sak a nih laiin a ṭhingṭhi a, vun rawng vanga inthliarna awm ṭhin a duh lohzia lantir nana a tih a ni.

Mahse, Kaepernick hian a hunlai hian thlawptu a ngah lo hle – kum 2017 hnuah phei chuan free agent a ni a, club nei loin a awm reng. Hetihlai hian NFL chuan Kaepernick-a chet dan anga chet hi an khap.

National Football League hian tun hnaiah erawh an dinna thlakin hnam hla sak laia ṭhingṭhi duh an awm a nih chuan an dal loh tur thu an sawi a, Goodell chuan Kaepernick tana thu hriat nuam a sawi zui.

Goodell chuan, "Kaepernick hian a career siam ṭhat leh a duh a nih chuan NFL team zingah amah duhtu an awm a ngai a, club zingah Kaepernick lalut duh an awm a nih chuan ka thlawp tlat a ni," a ti.

May 25-a US Police kuta mihang George Floyd thihna avangin tun hnaiah Black Lives Matter movement chuan khawvel a deng chhuak a, a bik takin US lamah an kalpui fawr nasa hle.